Солиқ кодексига тузатишлар лойиҳаси тайёрланди, деб хабар берилади Ўзбекистон Савдо-саноат палатаси сайтида.
Қонун лойиҳаси 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини "Халқ билан мулоқот ва инсон манфаатлари йили"да амалга оширишга оид Давлат дастурининг 171-бандида (Президентнинг 7.02.2017 йилдаги ПФ-4947-сон Фармони билан тасдиқланган) кўрсатилган механизмни амалга оширишга қаратилган.
Ўзгартиришлар моҳияти қуйидагилардан иборат. Объектлар қурилиши лойиҳа-смета ҳужжатида ўрнатилган норматив муддатда, қурилишнинг ўрнатилган норматив муддати мавжуд бўлмаганда – тадбиркорлик фаолиятини амалга ошириш учун ер участкаси ажратилган пайтдан эътиборан 24 ой мобайнида тугалланмаган тақдирда ер солиғи ва мол-мулк солиғи солиқ солинадиган база ҳамда белгиланган ставкаларнинг 3 баравар миқдоридан келиб чиқиб ҳисоблаб чиқарилади.
Мазкур тартиб тегишли ҳокимликнинг хулосасига мувофиқ қўлланилади. Ҳокимлик юқорида кўрсатилган фактлар тўғрисида ер участкаси жойлашган жойдаги солиқ органларига 3 календарь куни мобайнида хабар беришга мажбур бўлади.
Шунингдек қайд этиш жоизки, ҳокимлик хулосасида кўрсатилган объектлар қисмида мазкур механизмни солиқ солишнинг соддалаштирилган тартибини қўллайдиган юридик шахсларга ҳам татбиқ этиш таклиф қилинмоқда.
Лойиҳа ўзгартирилиши, тўлдирилиши ёки рад этилиши мумкин.
Олег ЗАМАНОВ,
экспертимиз.
