Тошкент вилоятида боғча қуриш учун объектлар танлов савдоларига қўйилди

Илгари Президентнинг 9.09.2017 йилдаги “Мактабгача таълим тизимини тубдан такомиллаштириш чора-тадбирлари тўғрисида”ги қарори эълон қилингани ҳақида хабар берган эдик. Унда давлат-хусусий шерикчилиги асосида янги давлатгача таълим муассасалари барпо этилиши кўзда тутилган. Қарор шарҳи билан бу ерда танишиш мумкин.

“Ноль” харид қийматида сотиладиган давлат объектлари бўйича очиқ танлов савдоларига юридик ва жисмоний шахслар, шу жумладан чет эл инвесторлари таклиф этилган. Инвестициявий ва ижтимоий мажбуриятлар қабул қилиниши орқали олинадиган объектлар фойдаланилмаётган, эскирган, қурилиши тугалланмай қолган мактаб ва боғчалар, чойхоналар, поликлиникалар, масжидлар ва бошқалардан иборат.

Танловда қатнашиш учун қуйидаги ҳужжатлар тақдим этилиши керак:

- буюртманома (2 нусхада);

- нодавлат юридик шахслар учун — ваколатли вакилнинг танловда қатнашиши учун ишончнома ва унинг шахсини тасдиқлайдиган ҳужжат;

- жисмоний шахслар учун — паспорт нусхаси (ваколатли вакил қатнашган тақдирда ишончнома ва унинг шахсини тасдиқлайдиган ҳужжат);

- муҳрланган конвертда бизнес-режа, танлов таклифлари (таклиф қилинган сотиб олиш тўловлари суммаси ва уни тўлаш муддатлари, таклиф қилинаётган инвестиция мажбуриятлари суммаси, унинг шакли, муддати ва киритиш шарти).

Тақдим этилган ҳужжатларнинг барча варақлари талабгорнинг муҳри ва имзоси билан тасдиқланган бўлиши шарт.

Айтиш жоизки, инвестиция киритиш муддати (5 ойдан 1,5 йилгача) тугаб, ишлаб чиқариш йўлга қўйилгандан сўнг, объектнинг 60%дан кам бўлмаган ҳудуди ишга туширилган ва ишлаб чиқариш билан банд бўлиши лозим.

Фозила Ашурова, мухбиримиз.