Адлия вазирлиги Telegram тармоғидаги ўзининг расмий каналида Эски намунадаги 50 ва 100 сўмлик тангаларини, шунингдек 50, 100, 200 ва 500 сўмлик банкнотларини айирбошлаш ҳамда муомаладан қайтариб олиш тартиби тўғрисидаги низом рўйхатдан ўтказилганлиги ҳақида хабар қилди.
Уларнинг ўрнига 2018 йил намунасидаги 50, 100, 200 ва 500 сўмлик тангалар муомалага чиқарилади.
Бу – муҳим! Эски намунадаги 50 ва100 сўмлик тангалар ҳамда 50 ва 100 сўмлик банкнотларни айирбошлаш муддати 1.07.2019 йилгача этиб белгиланди. 200 ва 500 сўмлик купюралар учун эса – 1.07.2020 йилгача. Шу пайтгача улар аввалгидек тўловларни амалга ошириш чоғида қабул қилиниши керак.
Тижорат банклари эски намунадаги пулларни ҳеч қандай монеликсиз ва чекловларсиз қабул қилишлари, шу жумладан мижозлар аризасига асосан банк омонатларига, банк пластик карточка ҳисобварақларига уларни кирим қилишлари, шунингдек ҳеч қандай тўлов ёки воситачилик ҳақи ундирмаган ҳолда уларни янги намунадаги тангаларга айирбошлаб беришлари шарт.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Самир Латипов.
