Лаҳзалик тўловлар сервиси Марказий банк томонидан тижорат банклари билан биргаликда ишга туширилди, деб хабар берди МБ матбуот хизмати.
Савдо-сервис корхоналари (хўжалик юритувчи субъектлар) сервисга уларга хизмат кўрсатувчи банклар орқали уланган ҳолда QR-кодни (Quick Response Code – тез аниқланадиган код) шакллантиришади ва рўйхатдан ўтказишади.
Харидорлар пуллик хизматлар етказиб берувчининг мобиль иловасида сотувчи кодини сканер қилиш ва харид суммасини киритиш йўли билан товарлар ва хизматларга ҳақ тўлайдилар. Пуллар иловага боғланган банк карталари ва электрон ҳамён ҳисобварақларидан ечиб олинади.
Банк шахсий кабинети орқали «Теlegram»да @onlineqrbot каналида онлайн режимда ёки СМС-хабарнома йўли билан маблағларнинг келиб тушишини кузатиб бориш мумкин.
Хизмат товарларни етказиб бериш ва йўловчилар ташиш соҳаларида фаолият кўрсатувчи ташкилотларда терминалдан фойдаланмасдан QR-код ёрдамида тўловларни қабул қилишнинг энг қулай воситаси сифатида талабгир бўлади. Тошкент шаҳрида 3 мингдан ортиқ QR-стикерлар тақдим этилди.
