“Қимор ва таваккалчиликка асосланган бошқа ўйинларни ташкил этиш, ўтказиш ва тарғиб қилиш билан боғлиқ ноқонуний фаолиятга қарши курашиш тизими такомиллаштирилиши муносабати билан Ўзбекистон Республикасининг Жиноят, Жиноят-процессуал ҳамда Маъмурий жавобгарлик тўғрисидаги кодексларига ўзгартириш ва қўшимчалар киритиш ҳақида”ги қонун лойиҳаси муҳокамага қўйилди.
Лойиҳа билан қимор ва таваккалчиликка асосланган бошқа ўйинларни қонунга хилоф равишда ташкил этиш, ўтказиш ёки уларда иштирок этиш учун телекоммуникация тармоқлари ёхуд Интернет жаҳон ахборот тармоғи орқали хизматлар кўрсатиш, тегишли дастурий таъминотдан нусха олиш, уни кўпайтириш, тарқатиш учун дарҳол жиноий жавобгарликни ўрнатиш таклиф этилмоқда (ҳозирда ушбу қилмиш учун жиноий жавобгарлик фақатгина такроран шу турдаги маъмурий ҳуқуқбузарликни содир этгандагина келиб чиқади).
Бундан ташқари қимор ва таваккалчиликка асосланган бошқа ўйинларни тарғиб қилувчи маҳсулотни қонунга хилоф равишда реклама қилиш, намойиш этиш, тарқатиш тарқатиш учун маъмурий жавобгарлик, ушбу ҳаракатлар такроран содир этилганда жиноий жавобгарлик ўрнатиш таклиф этилмоқда.
Лойиҳанинг тушунтириш хатида ушбу қонун қабул қилинган тақдирда тўлов хизматларини кўрсатиш ниқоби остида онлайн қимор ўйинларида қатнашиш учун электрон маблағлар билан таъминлаш хизматини йўлга қўйган шахслар ҳам жавобгарлик доирасига тушишлари баён этилмоқда.
Лойиҳа ўзгартирилиши, унга қўшимчалар киритилиши ёки рад этилиши мумкин.
Собир Нурбердиев.
