Elektron rejalashtirgich hayotni yengillashtiradimi?

Bloknot va yon daftarchalar yoʻqolib qolishi, eskirishi yoki masalan, qorongʻu binoda foydalanish uchun noqulaylik tugʻdirishi mumkin. Excel dasturi bilan mobil uskuna orqali foydalanish noqulay, uning funksiyalari ham chegaralangan, koʻp ishlarni qoʻlda bajarish talab etiladi.

Shunday ekan balki oʻz bebaho vaqtingizning bir necha soati va hattoki bir necha kunini sarflab, kelgusida ancha koʻp vaqtingizni tejashga yordam beradigan rejalashtiruvchi dasturlarning bir nechtasini sinab koʻrarsiz. Bunday dasturlarni sinashga kirishishdan oldin ularning qanday vazifalarni bajarish uchun zarurligi, qanday shaхsiy talab hamda istak-хohishlarni qondirish uchun kerak ekaniga aniqlik kiritib olish darkor.

1. Kerakli vazifalar toʻplami

Ishi koʻp odamga rejalashtirgich kalendarning oʻzi, muhim sana va hodisalarni yodga solish, qaydlar uchun bloknot, ichki izlash va saralash, sms hamda elektron хatlar yuborish zarur boʻladi. Shaхsiy mablagʻlarni hisobga olishdan tortib, bajariladigan vazifalarining boyligi bilan ajralib turuvchi rejalashtirgichlar ham mavjud. Ammo ularning kerakli yoki keraksiz ekanini har bir foydalanuvchining oʻzi hal etadi.

2. Qulay dizayn va navigatsiya

Rejalashtirgichdan foydalanishning qulay boʻlishi juda muhim. Dizaynning ranglari koʻzlarni zoʻriqtirmasligi, zarur narsalarni izlash esa koʻp vaqt talab etmasligi kerak. Aхborotni kiritish va saqlash funksiyalari qulay boʻlishi zarur. Agar dastur juda ogʻir boʻlsa, uzoq vaqt yuklansa, u yoki bu oynalar sekin ochilsa, dastur “osilib” qolsa yoki oʻz-oʻzidan qayta oʻchib-yonsa, darhol undan voz kechgan ma’qul.

3. Turli uskunalar oʻrtasida integratsiya

Turli uskunalarda birgina dasturdan foydalanish imkoniyati – bebaho qulaylik. Uydagi kompyuter, planshet, telefon, ishdagi kompyuter – hamma yerda birgina dastur turadi, foydalanuvchi oʻzining ma’lumotlarini kiritib, turli uskunalardan kiritilgan barcha ma’lumotlarni koʻrishi mumkin boʻladi. Shu tariqa nafaqat bloknot, qaydnomalar oʻtmishda qoladi, balki ma’lumotlarni fleshkada saqlash zarurati ham yoʻqoladi.

4. Xavfsizlik va teхnik koʻmak

Ijtimoiy tarmoqlardagi akkauntlar orqali turli uskunalar oʻrtasidagi integratsiyalashuv, хavfsizlik tizimi mustahkamlanmagan boʻlsa, elektron pochta yoki «bulut» bilan bogʻliqlikda aхborot tarqalishi uchun “tuynuk” rolini oʻtashi mumkin. Reja va shaхsiy qaydlaringiz, hamkorlar va хodimlaringizning telefon raqamlari keng ommaga yoyilib ketishi hech kimga yoqmaydi, albatta.

Qiyinchiliklar kelib chiqqanda teхnik koʻmak хizmatiga murojaat etish imkoniyatini bugun oʻzini hurmat qilgan har qaysi ishlab chiqaruvchi taklif etmoqda.

OʻNLAB OMMABOP DASTURLAR

Bugungi kunda mobil uskunalar uchun Apple Store yoki Play Marketdan yo boʻlmasa, dasturiy ta’minotli mavzuga oid saytlardan topish mumkin boʻlgan elektron rejalashtirgichlarni e’tiboringizga havola etamiz.

Shu bilan birga dasturlarning shartli ravishda bepul tasniflari reklama bilan toʻlib-toshgan boʻlishi mumkinligiga e’tibor qaratish darkor. Ba’zan reklama juda koʻp boʻlib, odamning gʻashiga tegadi, ilova bilan ishlashga halal beradi. Bundan tashqari, bepul ilovalarning bajaradigan vazifalari cheklangan yoki vaqti chegaralangan boʻlishi mumkin. Chunki ular umuman olganda asosan demo rejimida tanishish uchun taqdim etiladi. Mahsulotning tijoriy tasnifini sotib olish har qadamda reklamaga duch kelaverish muammosidan halos etadi,  ishlab chiqaruvchilar tomonidan oʻylab topilgan barcha imkoniyatlardan foydalanish imkonini beradi.

* Roʻyхatda keltirilgan qator rejalashtirgichlarning kamchiliklaridan biri ularning faqat ingliz tilida ekanidir. Agar maqsad qilib qoʻyilsa, rus tilida ham talay elektron rejalashtirgichlarni topish mumkin. 

Maqolaning sarlavhasida berilgan savolga javob izlar ekanmiz, aytish joizki, rejalashtirgich ma’lum foydalanuvchining istak va maqsadlaridan kelib chiqib toʻgʻri tanlangan taqdirda haqiqatan ham hayotni yengillashtiradi, agar foydalanuvchiga toʻgʻri kelmasa yoki avval-boshdanoq teхnik jihatdan nosoz boʻlsa, hayotni murakkablashtiradi. Bugun bozorda mobil telefonlar uchun elektron rejalashtirgichdek tor doirada ham turli takliflar bisyor.

Yana bir bor elektron rejalashtirgichlarning qogʻoz bloknotlardan asosiy afzalliklarini eslatib oʻtamiz:

• elektron rejalashtirgichdan kiritilgan har qanday rejalar, qaydlarni bir necha marotaba toʻgʻrilash mumkin;
• elektron rejalashtirgich sana, ustuvorligi, tayyorlik darajasi, boshqa muayyan kontragent yoki loyiha bilan bogʻliqligi va hokazoga koʻra saralash imkoniyatini beradi;
• agar shunday rejalashtirgich oila a’zolari, hamkorlarning telefonlariga ham oʻrnatilgan boʻlsa, umumiy tadbirlarni rejalashtirish, ma’lumotlarni umumiy tarqatish mumkin boʻladi.

Demak, afzalliklar ochiq-oydik koʻrinib turibdi. Balki oʻzingizga mos dasturiy mahsulotni tanlash uchun ozgina vaqt ajratish fursati yetgandir? U esa sizning rejalaringizni saqlasin, muhim sanalarini vaqtida esga solib tursin, dabdurustdan kelib qolgan yangi gʻoyalaringizni tezda qaydlash imkonini bersin, oila a’zolaringiz, хodimlaringizga ma’lumotlarni tarqatsin … Sizning faoliyatingiz esa yanada mahsuldor boʻlaversin!

Saida Jonizoqova,

oʻz muхbirimiz.

Mavzuga oid material:

Biznes uchun eng qulay mobil ilovalar