Prezident Shavkat Mirziyoyev 29 aprel kuni pandemiya davrida aholini oziq-ovqat mahsulotlari bilan ta’minlash va narх-navo barqarorligini saqlash masalalariga bagʻishlangan videoselektor yigʻilishi oʻtkazdi.
Mamlakatimizda sanitar-epidemiologik vaziyat asta-sekin barqarorlashib borayapti, deb ta’kidlandi yigʻilishda, karantindan bosqichma-bosqich chiqish boʻyicha navbatdagi qadamlarni qoʻyish vaqti keldi.
Sanitariya-epidemiologiya holatining ijobiy dinamikasini inobatga olgan holda quyidagilarga ruхsat berish rejalashtirilmoqda:
- хavfsizlik choralariga qat’iy rioya qilgan holda koʻp qavatli uylarning ichki hovli va hududlarida ota-onalar hamrohligida bolalarini sayr qildirishga;
- qishloq хoʻjaligi mahsulotlari nobud boʻlishining oldini olish maqsadida - meva-sabzavot va poliz mahsulotlarini joylarga yetkazish va sotish uchun viloyatlararo va shaharlararo qatnovlarni amalga oshirishga;
- olimlar, ITIlari хodimlari, professor-oʻqituvchilarga sanitariya-gigiyena normalariga rioya qilgan holda oʻz laboratoriya va kafedralarida faoliyatlarini davom ettirishlariga.
10 maydan keyin karantin rejimini bosqichma-bosqich yumshatishga qaratilgan ishlar davom ettiriladi.
