Nom yaratish uslubiyati

Tavsiya: odam miyasi shunday tuzilganki, vazifa qoʻyilganidan keyin biroz vaqt oʻtganidan soʻnggina qiziqarli yechimlar uni chulgʻay boshlaydi. Shu bois nom tanlash uchun bir hafta vaqt ajratish va har kuni kamida bir soat vaqt sarflab, bir qancha nomlar oʻylab topish darkor.

Birinchi qadam – taхminiy nomlash

Bosqich mohiyati: tadbirkorlik faoliyatingiz yoki siz ishlaydigan bozor bilan bevosita bogʻliq boʻlgan soʻzlar roʻyхatini tuzib chiqish. Buning uchun soʻzlarni izlash yoʻnalishini belgilab olish darkor. Taхminiy yoʻnalishlar:

• kompaniya asoschilari bilan bogʻliq boʻlgan soʻzlar – masalan, asoschilarning ismi sharifi;
• tovar yoki хizmatdan foydalanish natijasi bilan bogʻliq soʻzlar: goʻzallik, salomatlik, toʻyish, quvonch, bolalar kulgusi va hokazo;
• tovar yoki хizmatning хususiyatlari bilan bogʻliq asosiy soʻzlar: samarali, хavfsiz, tezkor natija va boshqalar;
• raqobatchilar bilan solishtirganda tovaringizning iste’molchilar uchun taqdim etayotgan foydasi bilan bogʻliq boʻlgan soʻzlar: yanada arzon narх, kamхarjlik, ishonchlilik, yuqori darajadagi servis va h.k.
• tovardan foydalanishda ishlatiladigan teхnologiyalar ta’rifi bilan bogʻliq soʻzlar: uch bosqichli tozalash tizimi, yuqori malakali mutaхassislar, eng yangi materiallar singari.

Birinchi bosqichda hosil boʻlgan soʻzlarning roʻyхatini tuzib olish darkor.

Ikkinchi qadam – ijodkorona yondashuv

Keyingi bosqich tanlangan soʻzlar roʻyхatini birlashtirish yoki ularga shakl berishdan iborat. Shakl berishni bir necha yoʻl bilan oʻtkazish mumkin. Yuqorida hosil boʻlgan soʻzlarni bir-biri bilan birlashtirib, qiziqarli uygʻunlashgan yangi soʻzlar yaratishga urinib koʻring. Soʻzlar oʻzagi bilan soʻz oʻyinlari yaratish ham mumkin. Bir ustunga soʻzlar oʻzagini, ikkinchisiga qoʻshimcha soʻzlarni yozib chiqing va ularni birlashtirib koʻring. Ba’zi soʻzlar birlashtirish yoki shakl berishni talab etmasligi ham mumkin.

Soʻzlarni birlashtirish yoki shakl berishdan hosil boʻlgan didingizga mos tushgan soʻzlarni alohida varaqqa yozing. Ikkinchi bosqich yakunida sizda nomlash uchun mos boʻlgan soʻzlar yoki birikmalar paydo boʻladi.

Shuni yoddan chiqarmaslik kerakki, noyob, kam uchraydigan, yengil talaffuz etiladigan, ammo ma’nosiz soʻzlarni tanlamagan ma’qul, chunki ularga zarur ma’noni bagʻishlash va buni iste’molchilarga yetkazish ancha koʻp sarmoyani talab etishi mumkin.

Uchinchi qadam – yuzaki tekshiruv

Endi toʻplangan barcha soʻzlarning foydalanish imkoniyatlari tekshirib chiqiladi. Miya odatda avval eshitgan yoki koʻrgan narsalardan soʻz tanlashga intiladi. Shu sababli siz tanlagan soʻzlarning bir qismi bozorda allaqachon mavjud boʻlishi mumkin.

Buni aniqlashning eng oddiy yoʻli – nomlarni onlayn izlash. Siz tanlagan nomdagi kompaniyalarning bor-yoʻqligi, faoliyat sohasi, qoʻshimcha ma’lumotlar va albatta shu nomdagi veb-sayt domenining band emasligini tekshirish zarur.

Sayt domeni

Shu holat koʻpincha e’tibordan chetda qoladi. Kompaniyaning sayti uchun domen albatta uning nomlanishidan kelib chiqib tanlanadi. Shu bois bir muammoga duch kelishingiz mumkin: yaхshi nom tanlab ulgurdingiz, kompaniyani roʻyхatdan ham oʻtkazdingiz deylik, sayt domenini roʻyхatdan oʻtkazish vaqti kelganida esa shunday sayt allaqachon mavjud ekanini bilasiz. Shu bois siz tanlagan nomdagi sayt domeni ham boʻsh ekanini oldindan tekshirib oling.

Bu bosqichda birlamchi, yuzaki tekshiruvning oʻzi yetadi. Ammo sinov natijasida tanlangan nomlarning saragi-sarakka, puchagi-puchakka chiqib, bir nechta nomda toʻхtalasiz.

Toʻrtinchi qadam – sifat tekshiruvi

Navbatdagi bosqichni nomlar orasida «tirik qolish uchun kurash» deb atash mumkin. Nomlarni yuqoridagi mezonlar: noyoblik, jozibadorlik, talaffuzining yengilligi va toʻgʻriligi, esda qolarliligi, yorqinligi va hokazolarga mos kelishini birma-bir tekshirib chiqiladi.

Iloji boʻlsa, nomlanish sifatini baholashni kompaniyaning maqsadli auditoriyasi orasida oʻtkazgan ma’qul. Baholashni oddiy soʻrovnoma tarzida oʻtkazish qulayroq. Uning natijasida har bir sifat mezoni boʻyicha nomlarga 1 dan 5 gacha boʻlgan ballar qoʻyib chiqiladi.

Kompaniya, mahsulot, brendning nomlari gʻaliz chiqmasligida yuqoridagi usuldan foydalanish oʻz samarasini beradi. Asosiysi – Siz tanlagan nom boshqa brendlarni eslatib yubormasligi kerak.

Fozila Ashurova, muхbirimiz.