Terminallar uchun ijara haqi 50 foizga qisqartiriladi

Milliy regulyator хabarida ta’kidlanishicha, kiritilayotgan oʻzgartirish va qoʻshimchalar Prezidentning “Respublikada bank plastik kartochkalari asosida naqd pulsiz hisob-kitob tizimini yanada rivojlantirish uchun qulay shart-sharoitlar yaratish chora-tadbirlari toʻgʻrisida” qarori doirasida qabul qilindi.

Joriy yilning 15 martidan kuchga kirgan yangi tarif rejasiga koʻra, yuridik shaхslar va yakka tartibdagi tadbirkorlarning toʻlov terminallari uchun toʻlaydigan ijara haqi 50 foizga qisqartirilmoqda. Demak,  endilikda yuridik shaхslar uchun ijara haqi 5 yevrogacha, yakka tartibdagi tadbirkorlarga esa 2,5 yevrogachani (Markaziy bankning toʻlov kunidagi kursi boʻyicha) tashkil qiladi.

Markaziy bank ma’lum qilgan boshqa yangilik jismoniy shaхslar plastik kartochkalari hisobvaragʻidagi qoldiq mablagʻlarga hisoblanadigan foizlarga taalluqli.

Eslatib oʻtamiz, ilgari tijorat banklari tomonidan jismoniy shaхslarning plastik kartochkalari hisobvaragʻidagi qoldiq mablagʻlarga hisoblanadigan foizlar Markaziy bankning qayta moliyalashtirish stavkasidan (ayni paytda -9%) kam boʻlmagan miqdorda belgilangan edi. Endilikda plastik kartochkadagi qoldiq mablagʻlarni kapitallashtirish tijorat banklari bilan tuziladigan shartnoma asosida amalga oshiriladi.

Xabarda qayd qilinishicha, mamlakatimiz tijorat banklari tomonidan plastik kartochkalardan foydalanish infratuzilmasini kengaytirish choralari koʻrilmoqda. Hozirgi paytda bank kartochkalari orqali qisqa muddatli iste’mol kreditlari berishni (overdraft) yoʻlga qoʻyish boʻyicha tartib ishlab chiqilmoqda. Ular boʻyicha foiz stavkalarini har bir bank oʻzining ichki kredit siyosatidan kelib chiqib, shartnoma asosida belgilaydi.

Bundan tashqari, banklar tomonidan savdo-servis tashkilotlari bilan birgalikda plastik kartochkalardan foydalanuvchilarning ularni ishlatishdan manfaatdorligini oshirishga yoʻnaltirilgan turli хil bonus, diskont va ragʻbatlantiruvchi dasturlarni tatbiq etish amaliyotini kengaytirish borasidagi ishlari izchil davom ettirib boriladi.