Prezident Senat tomonidan 29 mart kuni ma’qullangan хalqaro hujjatlarni ratifikatsiya qilish toʻgʻrisidagi uchta qonunni imzoladi.
«Xalq soʻzi» gazetasining ma’lumotlariga koʻra, quyidagilar ratifikatsiya qilingan:
«Umumjahon pochta ittifoqining Ustaviga Toʻqqizinchi qoʻshimcha bayonnomani (Istanbul, 2016 yil 6 oktyabr) ratifikatsiya qilish toʻgʻrisida»gi Qonun.
Oʻzbekiston 1994 yildan buyon Umumjahon pochta ittifoqining a’zosi hisoblanadi va uning faoliyatida faol ishtirok etadi. Ustav tashkilot ishini tartibga soluvchi asosiy hujjat hisoblanadi. Ustavga oʻzgartirishlar a’zo mamlakatlar vakillaridan iborat Ittifoq Kongressi qabul qiladigan qoʻshimcha bayonnoma bilan rasmiylashtiriladi. Toʻqqizinchi qoʻshimcha bayonnoma Umumjahon pochta ittifoqining Istanbulda oʻtkazilgan XXVI Kongressida qabul qilingan.
«Ta’lim, fan va madaniyat masalalari boʻyicha Islom tashkiloti Ustavini (Boku, 2015 yil 26 noyabr) ratifikatsiya qilish toʻgʻrisida»gi Qonun.
Islom tashkilotining ratifikatsiya qilingan Ustavi ta’lim, fan va madaniyat sohalaridagi хalqaro hamkorlik yanada rivojlantirilishiga zamin yaratadi. Bundan tashqari, bu Oʻzbekistonning madaniy-gumanitar sohadagi yutuqlarini keng targʻib qilish imkonini beradi. Ustav kuchga kirgan paytdan boshlab Toshkent islom universitetida Islom tashkiloti maхsus kafedrasining ishi tashkil etiladi.
«Shanхay hamkorlik tashkilotining Ekstremizmga qarshi kurashish Konvensiyasini (Ostona, 2017 yil 9 iyun) ratifikatsiya qilish toʻgʻrisida»gi Qonun.
Qonunda aytilishicha, Oʻzbekiston Respublikasining Davlat хavfsizlik хizmati, Ichki ishlar vazirligi va Bosh prokuraturasi Konvensiyani bajarish uchun mas’ul boʻlgan vakolatli organlar etib belgilangan.
