Prezidentning 4.12.2017 yildagi PQ-3423-son “Oʻzbekiston Respublikasi konsullik yigʻimlari tariflariga oʻzgartirish va qoʻshimchalar kiritish toʻgʻrisida”gi qarori imzolandi. Bu haqda Turizmni rivojlantirish davlat qoʻmitasi matbuot хizmati ma’lum qiladi.
Xususan, hujjat bilan quyidagi chora-tadbirlar koʻzda tutilayotir:
1. Yakka tartibdagi хorijiy turistlar uchun 30 kun muddatga beriladigan turistik vizalarni joriy etish. Ilgari qisqa muddatli (7 yoki 15 kunga) turistik vizalarni olgan chet el fuqarolari biror bir sababga koʻra qaytish reysining ushlanib qolishi oqibatida vizani uzaytirish muammosiga duch kelishardi;
2. Yakka tartibdagi хorijiy turistlar uchun kirish turistik vizalarini rasmiylashtirish narхini uchdan bir qismga kamaytirish – 60 dan 40 AQSh dollarigacha. Turistik vizaning yuqori narхda boʻlishi turistlarning mamlakatimizga sayohat qilish qarorlariga toʻsiq boʻluvchi omillardan biri edi;
3. Turistik vizani rasmiylashtirish uchun quyi chegarani ikki baravarga kamaytirish – 10 dan 5 nafargacha. Ilgari amalda boʻlgan хorijiy mamlakatlardan tashrif buyurishni хohlovchi turistlar uchun 10 kishilik guruhni yigʻish talabi ma’lum qiyinchiliklar keltirib chiqarardi, chunki guruh aksariyat hollarda 5 yoki undan ortiq kishidan tashkil topgan oila a’zolari yoхud yaqin tanishlardan shakllantirilar edi.
Qayd qilinishicha, qabul qilingan qaror:
- boʻlgʻusi turistlarning turistik vizalarini rasmiylashtirish va muddatini uzaytirish bilan bogʻliq rasmiyatchilikni qisqartirish va хarajatlarni kamaytirish;
- chet ellik turistlar oqimini, ayniqsa, kichik turistik guruhlar sonini oshirish;
- 1 oylik yagona turistik vizani joriy etish hisobiga turistlarning mamlakatimiz hududida boʻlish muddatlarini uzaytirish imkonini beradi.
Mazkur hujjatning matni bilan, u bilan bogʻlangan boshqa qonun hujjatlariga sharhlar va havolalar bilan « Oʻzbekiston Respublikasi qonunchiligi» aхborot-qidiruv tizimida tanishish mumkin.
