Prezident inauguratsiyasi boʻlib oʻtdi

Qoʻshma majlisni Markaziy saylov komissiyasi (keyingi oʻrinlarda – MSK) Raisi Mirza-Ulugʻbek Abdusalomov ochdi. U yurtimizda 2016 yil 4 dekabr kuni boʻlib oʻtgan Prezident saylovi yakunlari boʻyicha saylovchilarning 88,61 foiz ovozi bilan Tadbirkorlar va ishbilarmonlar harakati - Oʻzbekiston Liberal-demokratik partiyasidan koʻrsatilgan nomzod Shavkat Miromonovich Mirziyoyev Oʻzbekiston Respublikasi Prezidenti etib saylanganligini ta’kidladi. Shuningdek,  MSKning 2016 yil 9 dekabr kuni boʻlib oʻtgan majlisida saylov natijalari koʻrib chiqilib, Oʻzbekiston Respublikasi Prezidenti lavozimiga Shavkat Miromonovich Mirziyoyev saylangani toʻgʻrisida qaror qabul qilinganini qayd etdi.

MSK Raisi zalda hozir boʻlganlar va saylovchilar nomidan Shavkat Mirziyoyevni Oʻzbekiston Respublikasi Prezidenti etib saylangani bilan samimiy tabriklab, unga Oʻzbekiston Respublikasi Prezidenti guvohnomasi va Oʻzbekiston Respublikasi Markaziy saylov komissiyasining shahodatnomasini topshirdi.   

Konstitutsiyaning  92-moddasiga muvofiq Shavkat Mirziyoyev qasamyod qildi: "Oʻzbekiston хalqiga sadoqat bilan хizmat qilishga, Respublikaning Konstitutsiyasi va qonunlariga qat’iy rioya etishga, fuqarolarning huquqlari va erkinliklariga kafolat berishga, Oʻzbekiston Respublikasi Prezidenti zimmasiga yuklatilgan vazifalarni vijdonan bajarishga tantanali qasamyod qilaman".

Qasamyoddan soʻng Shavkat Mirziyoyev nutq soʻzladi.

Mavzuga oid materiallar:

Saylov kampaniyasi faollashmoqda

Oʻzbekiston Respublikasi Prezidenti saylovi 2016 yil 4 dekabrda boʻlib oʻtadi

Prezidentning vazifalari Bosh vazir Sh.Mirziyoyevga vaqtincha yuklandi