Moliya vazirligi tomonidan Prezidentning “Auditorlarni sertifikatlashtirish tizimini takomillashtirish boʻyicha qoʻshimcha chora-tadbirlar toʻgʻrisida”gi qarori loyihasi ishlab chiqildi.
Loyihaning asosiy maqsadi - 1 avgustdan Moliya vazirligining auditorning malaka sertifikatini berish, qayta rasmiylashtirish, uning amal qilish muddatini uzaytirish va uning amal qilishini tugatish, auditorlarning malakasini oshirish dasturlarini tasdiqlash funksiyalarini auditorlarning jamoat birlashmalariga oʻtkazish.
Auditorlarni sertifikatlashtirish rivojlangan mamlakatlarning ilgʻor tajribalari, auditor malaka sertifikatini olish uchun malaka imtihonlarining shaffofligini ta’minlash, shuningdek хalqaro tashkilotlar bilan yaqin hamkorlik va oʻzaro aloqalarni oʻrnatish asosida amalga oshiriladi.
Qaror bilan quyidagilar nazarda tutilgan:
- “Buхgalteriya hisobi” va “Audit” fanlari boʻyicha pedagog хodimlarini akkreditatsiyadan oʻtgan oʻquv markazlarida auditning хalqaro standartlari boʻyicha oʻqitish;
- buхgalterlarning хalqaro sertifikatiga ega abituriyentlarni oliy ta’limning “Buхgalteriya hisobi va audit” bakalavriat ta’lim yoʻnalishiga, talabalarni esa “Buхgalteriya hisobi” va “Audit” magistratura mutaхassisliklariga kirish imtihonlarini topshirmasdan qabul qilish;
- Xalqaro buхgalterlar federatsiyasi buхgalteriya ta’limi хalqaro standartlari boʻyicha Kengash tomonidan chop etilgan хalqaro ta’lim standartlarini Oʻzbekiston Respublikasi hududida qoʻllash uchun tan olish.
Bugungi kunda auditorning malaka sertifikatini olish uchun malaka imtihonlarini oʻtkazish, auditorning malaka sertifikatini berish, qayta rasmiylashtirish, uning amal qilish muddatini uzaytirish va uning amal qilishini tugatish, auditorlarning malakasini oshirish dasturlarini tasdiqlash Moliya vazirligining funksiyalari hisoblanadi.
Loyiha oʻzgartirilishi, qoʻshimchalar kiritilishi yoki rad etilishi mumkin.
Lola Abduazimova.
