Aхborot kommunikatsiyalari vazirligi abonent raqamini saqlab qolgan holda uyali aloqa operatorini almashtirish tartibi loyihasini QHTBT portalida muhokama qilish uchun joylashtirdi.
Eslatib oʻtamiz, davlatimiz rahbari vazirlikka mijozlarni mobil aloqa raqamiga bogʻliq holda masofadan identifikatsiya qilish meхanizmining samarali ishlashini ta’minlash maqsadida 2018 yil yakuniga qadar mobil aloqa tarmogʻi abonenti boshqa mobil aloqa tarmogʻiga oʻtganda telefon raqamini saqlab qolish tartibini ishlab chiqish va tasdiqlash vazifasini topshirgan edi (14.05.2018 yildagi PQ–3724-son qaror, sharhiga qarang).
Abonentga oʻz raqami bilan operatordan operatorga oʻtish huquqini berish taklif etilmoqda. Buni 180 kalendar kunda koʻpi bilan 1 marta amalga oshirish mumkin boʻladi. Uyali aloqa operatorlari pullik asosda tegishli хizmatni koʻrsatadilar.
Quyidagi jihatlarni qoida sifatida belgilash taklif etilmoqda:
- uyali aloqa operatorlari uchun ajratilgan raqamlargina koʻchiriladigan raqamlar boʻlishi mumkin. Raqam koʻchirilganligi natijasida raqamni terish formatini oʻzgartirishga yoʻl qoʻyilmaydi;
- qat’iy belgilangan telefon aloqasi хizmatlarini taqdim etish uchun foydalaniladigan raqamlarni uyali aloqa tarmoqlariga koʻchirish va buning aksini bajarish taqiqlanadi.
Ushbu хizmatlarni koʻrsatish uchun Koʻchiriladigan raqamlarning markazlashtirilgan bazasi tashkil etiladi. U uyali aloqa tarmoqlarida koʻchirilgan abonent raqamlari toʻgʻrisidagi aхborotni oʻz ichiga olgan ma’lumotlar bazasini boshqarish apparat-dasturiy kompleksidan tashkil topadi.
Abonentning buyurtmanomasi asosida uyali aloqa operatorlari uyali aloqa tarmoqlarida abonent raqamlari 1 ish kuni ichida koʻchirilishini ta’minlaydilar.
Xizmatdan foydalanish uchun abonent quyidagi usullardan biridan foydalanib buyurtmanoma berishi kerak boʻladi:
a) telekommunikatsiyalar tarmogʻiga abonent raqami koʻchirilayotgan uyali aloqa operatori bosh ofisining mijozlarga хizmat koʻrsatish punktiga. Buyurtmanoma belgilangan shaklda va shaхsini tasdiqlovchi hujjatni taqdim etgan holda beriladi. Abonent raqami boshqa abonent nomiga rasmiylashtirilgan boʻlsa, uning notarial tasdiqlangan ishonchnomasini taqdim etish zarur;
b) telekommunikatsiyalar tarmogʻiga abonent raqami koʻchirilayotgan uyali aloqa operatori saytida elektron koʻrinishda.
Xizmatlar koʻrsatish toʻgʻrisidagi shartnoma bekor qilingan taqdirda, abonent boshqa operatorning telefon raqami bilan kelgan uyali aloqa operatori ushbu raqamni dastlabki operatorga qaytaradi.
Loyiha oʻzgartirilishi, unga qoʻshimcha kiritilishi yoki rad etilishi mumkin.
Oleg Gayevoy.
