Mamlakatimizning mualliflik huquqi va fonogrammalarni ishlab chiqish borasidagi uchta хalqaro shartnomaga qoʻshilishi toʻgʻrisidagi qonun loyihasi e’lon qilindi.
Intellektual mulk agentligi tomonidan ishlab chiqilgan qonun loyihasida quyidagi хalqaro shartnomalar asosiy oʻrinni egallaydi:
- Fonogrammalar ishlab chiqaruvchilar manfaatlarini ular fonogrammalarining noqonuniy ishlab chiqarilishidan muhofaza qilish toʻgʻrisidagi konvensiya (Jeneva, 1971 yil 29 oktyabr). U ishtirokchilarga ahdlashuvchi har qanday davlatning fuqarolari boʻlgan fonogrammalar ishlab chiqaruvchilarning manfaatlarini muhofaza qilish mas’uliyatini yuklaydi. Huquqiy muhofaza doirasiga ishlab chiqaruvchilarning roziligisiz fonogrammalar dublikatlarini tayyorlash va bunday dublikatlarni tarqatish uchun olib kelish, shuningdek ommaviy ma’lumot sifatida bevosita tarqatishga boʻlgan taqiq kiradi.
- Jahon intellektual mulk tashkilotining mualliflik huquqi boʻyicha shartnomasi (Jeneva, 1996 yil 20 dekabr). U mamlakatimiz 2004 yilda qoʻshilgan Adabiy va badiiy asarlarni muhofaza qilish boʻyicha Bern konvensiyasi (Bern, 1886 yil 9 sentyabr) doirasidagi maхsus хalqaro bitim hisoblanadi (19.04.2005 yildan kuchga kirgan). Shartnoma asarlar va ularning mualliflari huquqini raqamli muhitda muhofaza qilishga doirdir. Shu jumladan shartnoma kompyuter dasturlari va ma’lumotlar bazasini ham qamrab oladi.
- Jahon intellektual mulk tashkilotining ijro va fonogrammalar boʻyicha shartnomasi (Jeneva, 1996 yil 20 dekabr). Ijrochilar va fonogrammalar ishlab chiqaruvchilar huquqlarini (ayniqsa raqamli muhitda) himoya qilishga yoʻnaltirilgan.
Ma’lumot uchun: mualliflik huquqlarini milliy darajada muhofaza qilish ta’minlangan, shu jumladan bu boradagi huquqbuzarliklar uchun jinoiy javobgarlik belgilangan. Intellektual mulk ob’yektiga nisbatan mualliflik huquqini oʻzlashtirib olish, hammualliflikka majburlash, bunday mulk ob’yektlari toʻgʻrisidagi ma’lumotlarni ular rasman roʻyхatdan oʻtkazilgunga yoki e’lon qilingunga qadar muallifning roziligisiz oshkor qilish holatlari jarimalar solinishi sabab boʻladi (JKning 149-moddasi).
Loyiha oʻzgartirilishi, qoʻshimcha kiritilishi yoki rad etilishi mumkin.
Oleg Zamanov.
