Президентнинг 22.02.2019 йилдаги «Социологик тадқиқотлар ўтказишни давлат томонидан қўллаб-қувватлаш чора-тадбирлари тўғрисида»ги ПФ–5667-сон Фармони қабул қилинди.
«Ижтимоий фикр» жамоатчилик фикрини ўрганиш маркази муассисларининг таклифига кўра у «Ижтимоий фикр» республика жамоатчилик фикрини ўрганиш маркази (бундан кейин – Марказ) этиб қайта номланди.
Марказ Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағлари ҳисобидан таъминланади. 2019–2020 йилларда Марказни ускуналар, техника ва бошқа воситалар билан жиҳозлаш дастури тасдиқланди.
Телефон ва Интернет тармоғи орқали ижтимоий-сиёсий, ижтимоий-иқтисодий ва мамлакатимиз ҳаётининг бошқа йўналишларига доир долзарб жорий масалалар юзасидан аҳоли ўртасида блиц-сўров ўтказиш учун call-маркази ташкил этилади.
Энди Марказ томонидан ўтказилган социологик сўров натижалари Вазирлар Маҳкамаси ва унинг Раёсати мажлисларида мунтазам муҳокама қилинади ҳамда улар бўйича зарур чора-тадбирлар кўрилади. Бундан ташқари, сўров натижалари ОАВ ва Марказнинг веб-сайтида доимий ёритиб борилиши зарур.
Марказ кадрлар тайёрлашда фаол иштирок этади, унинг базасида талабалар амалиёт ўташи ташкил этилади. Тегишли олий таълим муассасаларида 2019/2020 ўқув йилидан бошлаб социология ва социологик тадқиқотлар кафедраларини очиш масаласи кўриб чиқилмоқда.
Ўзбекистон социологлари ассоциацияси ташкил этилмоқда. Қуйидагилар унинг асосий вазифалари этиб белгиланди:
- ўз аъзоларининг ҳуқуқлари ва қонуний манфаатларини ифодалаш ва ҳимоя қилиш;
- илмий тадқиқотлар, ижтимоий мезонлар методологиясини такомиллаштириш бўйича ишларда, мамлакатимиз социология ҳамжамиятининг интеллектуал ва илмий-техник салоҳиятини юксалтиришда иштирок этиш, шу жумладан, ижтимоий тажрибалар ўтказиш бўйича таклифлар киритиш;
- Ўзбекистонда ва хорижда демографик жараёнларни ўрганиш ва таҳлил қилишга кўмаклашиш;
- социологлар ва бошқа ходимларнинг малакасини ошириш;
- олий таълим муассасаларининг ўқув дастурларига социология фанидаги энг янги ютуқларни ва социологик тадқиқотлар ўтказишнинг инновацион ёндашувларини жорий этиш бўйича улар билан ҳамкорлик қилиш;
- халқаро ва хорижий социологлар ассоциациялари билан ҳамкорлик қилиш, сифатли социологик ишларни, шу жумладан, хорижда ўтказиш мақсадида консорциум ташкил этиш;
- Халқаро социологлар ассоциациясига аъзо бўлиш, бутун жаҳон социологик конгресслар ва форумларда иштирок этиш.
Ҳужжат Қонун ҳужжатлари маълумотлари миллий базасида эълон қилинган ва 22.02.2019 йилдан кучга кирди.
Олег Гаевой.
