Бир йил аввал жорий қилинган мобил иловалар орқали чет эл валютасини жисмоний шахсларга сотиш (онлайн-конверсия) бўйича банк хизмати аҳоли ўртасида тобора оммалашиб бормоқда, дея қайд этилади Марказий банк хабарида.
Ўтган йилнинг апрель ойидан жорий йилнинг апрель ойигача бўлган даврда жисмоний шахслар томонидан $1,2 млрд миқдорида чет эл валютаси харид қилинган. Ушбу сотиш ҳажмининг 36%и мобил иловалар ҳиссасига тўғри келмоқда. Бунда онлайн-конверсия улушининг кескин ошиши 2019 йил январь ойидан бошлаб кузатилмоқда.
Чет эл валютасини масофадан туриб харид қилиш учун қуйидагиларга эга бўлиш зарур:
- сўмдаги банк картаси;
- халқаро тўлов картаси;
- карта счётида айирбошлаш учун тайёрланган ҳажмдаги пул маблағларининг мавжуд бўлиши;
- тегишли хизматни тақдим этувчи банкнинг мобил иловаси ўрнатилган смартфон.
Янги хизматга талаб ортишига қуйидагилар асосий омил бўлмоқда:
- банкка ташриф буюриш зарур эмаслиги;
- хизматдан куну тун фойдаланиш имконияти.
