Вазирлар Маҳкамасининг 04.10.2023 йилдаги «Давлат даромадига олинган мол-мулкларни соддалаштирилган аукцион тамойиллари асосида «E-auksion shop» электрон савдо дўкони орқали сотиш тартиби тўғрисида»”ги 526-сон қарори қабул қилинди.
Ҳужжат қуйидаги мол-мулкни сотишни тартибга солмайди:
- озиқ-овқат маҳсулотларини;
- автомототранспортни;
- кўчмас мулкни.
Ҳужжатга мувофиқ:
- савдода иштирок этиш учун платформада рўйхатдан ўтиш лозим. Закалат пули мол-мулк бошланғич нархининг 5 % миқдорида белгиланади;
- савдо хабарнома электрон дўконда эълон қилинган кундан кейинги иш куни соат 10:00 да бошланади ва беш иш куни давомида, охирги иш куни соат 18:00 га қадар ўтказилади;
- савдо камида 2 нафар иштирокчи бўлса ўтказилади;
- бошланғич нарх буюртмачи томонидан белгиланади.
Аукцион қадамлари қуйидаги миқдорларда белгиланмоқда:
- дастлабки тўрт қадам – бошланғич нархнинг 5 % миқдорида;
- бешинчи ва ундан кейинги қадамлар – бошланғич нархнинг 3 % миқдорида;
Бошланғич нарх БҲМнинг 2 минг бараваридан ошган тақдирда, барча аукцион қадамлари бошланғич нархнинг 2% миқдорида белгиланади.
Аукцион ғолибига лот тўлиқ тўланган пайтдан кейинги иш кунида шахсий кабинет орқали QR-кодли савдо натижалари ҳақида баённома юборилади.
Савдо ўтказилиши ҳақидаги хабарнома эълон қилинган пайтдан бошлаб лот 2 ой ичида сотилмаган тақдирда, савдо объектининг бошланғич нархини босқичма-босқич, лекин бошланғич нархининг 50 %дан кўп бўлмаган миқдоргача пасайтирган ҳолда такрорий савдоларни ташкил этиш мумкин.
Савдо ғолиби лот қийматини 3 иш куни ичида тўлаши лозим.
Ҳужжат Қонун ҳужжатлари маълумотлари миллий базасида давлат тилида эълон қилинган ва 06.01.2024 йилдан кучга киради.
Собир Нурбердиев.
