Президент томонидан 17.10.2024 йилдаги «Ўзбекистон Республикаси Конституцияси куни байрамига тайёргарлик кўриш ва уни ўтказиш тўғрисида»ги Ф-53-сонли Фармойиши имзоланди.
Ҳужжат билан Ўзбекистон Республикаси Конституцияси куни байрамига тайёргарлик кўриш ва уни ўтказиш бўйича ташкилий қўмитанинг таркиби тасдиқланди. Унинг раиси этиб Бош вазир тайинланди.
Шунингдек, Конституция кунига бағишланган байрам тадбирларига тайёргарлик кўриш ва уларни ўтказиш дастури қабул қилинган бўлиб, унда қуйидаги бешта йўналиш бўйича 50 дан зиёд тадбирлар акс эттирилган:
- Конституция мазмун-моҳиятини кенг жамоатчиликка тушунтириш бўйича ташкилий тадбирлар;
- маънавий-маърифий тадбирлар ва тарғибот-ташвиқот ишлари;
- байрам ва бошқа кўнгилочар тадбирлар;
- давлат органлари ва ташкилотларида ташкил этиладиган тадбирлар
- таълим ташкилотларида ташкил этиладиган тарғибот тадбирлари.
Тадбирлар «Конституция — эркин ва фаровон ҳаёт гарови!» деган бош ғояни ўзида мужассам этади.
Ҳужжат Қонун ҳужжатлари маълумотлари миллий базасида эълон қилинган ва 18.10.2024 йилдан кучга кирди.
Собир Нурбердиев
