Prezidentning 28.12.2017 yildagi PF-5291-son Mehnat faoliyatini amalga oshirayotgan pensionerlarning alohida toifalariga qulay shart-sharoitlar yaratishga doir qoʻshimcha chora-tadbirlar toʻgʻrisidagi Farmoni e’lon qilindi.
Pensiyalar va nafaqalar toʻgʻri hisoblanishini tekshirish natijalari boʻyicha aniqlangan ortiqcha toʻlangan pensiyalar va nafaqalarning qoldiqlari summalari (1.01.2018 yil holatiga):
- 65 yosh va undan katta fuqarolardan;
- agar pensiya yoki nafaqa 2010 yilgacha boʻlgan muddatga tayinlangan boʻlsa hisobdan chiqariladi.
Pensioner rozi emasmi – sudga murojaat qiling
Shu yildan boshlab ortiqcha toʻlangan pensiyani chegirma qilishning yangi tartibi joriy etiladi. Endilikda pensioner byudjetdan tashqari Pensiya jamgʻarmasi tuman (shahar) boʻlimining ortiqcha toʻlangan pensiya summalarini chegirma qilish toʻgʻrisidagi qaroridan norozi boʻlgan taqdirda qarz sud tartibida, biroq u aniqlangan sanadan e’tiboran 3 yildan koʻp boʻlmagan muddat uchun undiriladi.
Ma’lumot uchun. Byudjetdan tashqari Pensiya jamgʻarmasi tuman (shahar) boʻlimining qaroriga asosan:
- pensioner tomonidan suiiste’molliklar (qasddan notoʻgʻri hujjatlarni taqdim etish, boquvchisini yoʻqotganlik pensiyasi yoki nafaqasi tayinlangan oila a’zolari tarkibidagi oʻzgarishlar haqida ma’lumotlar taqdim etmaganligi) natijasida;
- hisoblashdagi yoki boshqa teхnik хato oqibatida pensiya miqdoridan ortiqcha pullar toʻlangan taqdirda pensiyadan chegirma qilinadi.
Ishlaganmisiz? Sud tasdiqlaydi!
Hududiy pensiya boʻlinmalari fuqarolarga ish stajini tasdiqlash toʻgʻrisidagi sud da’volarini tayyorlashda koʻmak beradi. Sudlarga shaхslarning ish stajini tasdiqlash toʻgʻrisidagi da’volarini ishning yuridik faktini belgilash qismida koʻrib chiqish tavsiya etildi.
Hujjat Qonun hujjatlari ma’lumotlari milliy bazasida rasman e’lon qilindi va 29.12.2017 yilda kuchga kirdi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Lenara Xikmatova.
