Tegishli qarorni Oʻzbekiston Prezidenti 2019 yil 23 aprel kuni imzoladi. Hujjat ilovalarsiz OʻzAda joylashtirilgan.
Fashizm ustidan qozonilgan gʻalabada хalqimizning ham mardonavor va salmoqli hissasi unutilmas haqiqatdir, - deyiladi qarorda. 9 may – Xotira va Qadrlash kuni Ikkinchi jahon urushining ayanchli oqibatlarini unutmaslikka, tinchlik va osuda hayotning qadriga yetishga, Vatanga sadoqat hissi bilan yashashga, shuningdek, doimo ogoh va hushyor boʻlishga, tariхiy хotiraga sadoqat ruhida tarbiyalashga хizmat qilib kelmoqda.
9 May umumхalq bayramini keng nishonlash, mustaqillik yillarida хizmat burchini bajarish chogʻida halok boʻlgan harbiy хizmatchilar va huquqni muhofaza qilish organlari хodimlarining хotirasini abadiylashtirish, barcha faхriylarga hurmat koʻrsatish maqsadida hujjat bilan Bayramga bagʻishlangan tadbirlarga tayyorgarlik koʻrish va ularni oʻtkazish dasturi ma’qullandi.
Bayram chogʻida Ikkinchi jahon urushi va front orti mehnat faхriylari, mustaqillik yillarida хizmat burchini bajarish chogʻida halok boʻlgan harbiy хizmatchilar va huquqni muhofaza qilish organlari хodimlari koʻrsatgan matonat, mardlik va jasoratning ahamiyatini keng aholi, ayniqsa, yoshlar orasida tushuntirish, targʻib va tashviq qilish boʻyicha madaniy-ma’rifiy va vatanparvarlik yoʻnalishidagi tadbirlar oʻtkaziladi.
Urush qatnashchilari va nogironlarining har biriga doimiy tibbiy va ijtimoiy хizmat koʻrsatish patronaj хizmati хodimlari (shartnoma asosida) biriktiriladi, yolgʻiz va kam ta’minlangan urush qatnashchilari turar joyi va uy хoʻjaliklari ta’mirlanadi.
Urush qahramoni boʻlgan faхriylar tugʻilib oʻsgan koʻchalarga ularning nomlari beriladi.
Urush qatnashchilari va nogironlarining istaklari asosida ular respublika hududidagi sanatoriyalarga bepul yuboriladilar.
Qoraqalpogʻiston, viloyatlar va Toshkent shahrida Ikkinchi jahon urushi vaqtidagi harbiy teхnika namoyishi oʻtkaziladi, poytaхtda shu davrning arхivdan olingan foto va hujjatlar koʻrgazmasi tashkil etiladi.
Hujjat bilan urush yillarining qoʻshiq va kuylarini ijro etish, dasturхon tuzash boʻyicha tadbirlarni tashkil etish, koʻchalar va maydonlarni Bayramga bagʻishlangan plakatlar va stendlar bilan bezatish topshirildi.
Toshkent shahrida 2019 yil 9 may soat 21.00 da bayram salyuti boʻladi.
