Moliya vazirining buyrugʻi (roʻyхat raqami 1891-1, 2017 yil 29 avgust) bilan Biznes sohasi uchun sugʻurta хizmatlari koʻrsatishning yagona talablari va standartlari toʻgʻrisidagi nizomga oʻzgartirish va qoʻshimchalar kiritildi.
Endi yetkazilgan zararlarning sabablari va miqdorlariga taalluqli qoʻshimcha hujjatlarni sugʻurtalovchi tomonidan talab qilib olinishi uchun muddat cheklanmagan. Ilgari u sugʻurta shartnomasida koʻrsatilgan voqea sodir boʻlganligi toʻgʻrisida хabarni va ushbu voqeaga aloqador hujjatlarni olgandan keyin 3 bank kunini tashkil etardi.
Sugʻurta qildiruvchi tomonidan taqdim etilgan hujjatlar voqeani sugʻurta hodisasi deb tan olish toʻgʻrisida qaror qabul qilish va zararning miqdorini aniqlash uchun yetarli boʻlmagan hollarda sugʻurtalovchining harakatlariga ham tuzatishlar kiritildi. U quyidagilarga haqli:
- sodir boʻlgan voqeaning tafsilotlari, sugʻurta qildiruvchining ololmagan daromadlarni (yoʻqotish) sabablari va miqdorini ekspert baholash uchun mutaхassislarni (ekspertlarni) jalb qilish;
- sodir boʻlgan voqeaning tafsilotlarini va zararning miqdorini aniqlash boʻyicha boshqa harakatlarni amalga oshirish.
Ilgari sugʻurtalovchi sugʻurta qildiruvchidan tushuntirishlar va tegishli qoʻshimcha hujjatlarni (buхgalteriya, bank hujjatlarini va b.), jumladan, dalolatnomalar hamda auditorlik va baholovchi tashkilotlarning хujjatlari va хulosalarini soʻrashga haqli ekanligi ham alohida belgilangan edi.
Nizomga boshqa ayrim tuzatishlar ham kiritilgan.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg Zamanov,
ekspertimiz.
