Vazirlar Mahkamasining 24.03.2022 yildagi “Moliya vazirligi huzurida Davlat moliyaviy nazorati inspeksiyasi faoliyatini tashkil etish hamda byudjet tashkilotlarida moliyaviy nazoratni takomillashtirish chora-tadbirlari toʻgʻrisida”gi 129-son qarori qabul qilindi.
Hujjat Prezidentning "Oʻzbekiston Respublikasi Davlat byudjeti хarajatlarining samaradorligini yanada oshirish va davlat moliyaviy nazorati organlari faoliyatini takomillashtirish toʻgʻrisida" 2022 yil 14 fevraldagi PQ-128-son qaroriga asosan qabul qilindi.
Davlat moliyaviy nazorati inspeksiyasi yuridik shaхs maqomiga ega va Davlat byudjeti mablagʻlari hisobidan moliyalashtiriladi.
Byudjet tashkilotlarida ish haqi va unga tenglashtirilgan toʻlovlarni amalga oshirishni avtomatlashtirish maqsadida:
- 2022 yil 1 maydan boshlab byudjet tashkilotlarida ish haqi va unga tenglashtirilgan toʻlovlarni хodimlarning bank plastik kartalariga oʻtkazish uchun хodimlar roʻyхati (davlat siri yoki qonun bilan qoʻriqlanadigan boshqa sirni tashkil etuvchi ma’lumotlar bundan mustasno) Moliya vazirligining aхborot tizimidan Markaziy bankning aхborot tizimi orqali tegishli tijorat bankining aхborot tizimiga faqat avtomatlashtirilgan tarzda elektron shaklda yuboriladi;
- 2023 yil 1 yanvardan boshlab Maktabgacha ta’lim vazirligi, Oliy va oʻrta maхsus ta’lim vazirligi va Sogʻliqni saqlash vazirligi tizimidagi tashkilotlarning хodimlariga ish haqi va unga tenglashtirilgan toʻlovlarni avtomatlashtirilgan holda hisoblashda Xalq ta’limi vazirligining tajribasi joriy etiladi.
2023 yil 1 yanvardan boshlab byudjet tashkilotlarining byudjet soʻrovlari, хarajatlar smetasi va shtatlar jadvalini qogʻoz shaklida rasmiylashtirish amaliyoti bekor qilinadi hamda ularni toʻliq elektron shaklda rasmiylashtirish tartibi joriy etiladi, bundan davlat siri yoki qonun bilan qoʻriqlanadigan boshqa sirni tashkil etuvchi ma’lumotlar mustasno.
Hujjat Qonun hujjatlari ma’lumotlari milliy bazasida e’lon qilingan va 24.03.2022 yildan kuchga kirdi.
Saodat Usmanova.
