Prezident tomonidan 07.03.2025 yildagi «Oʻzbekiston Respublikasining ayrim qonun hujjatlariga chiqindilarni toʻplash va olib chiqish хizmatlarini koʻrsatish sohasida toʻlov intizomini mustahkamlashga qaratilgan qoʻshimcha va oʻzgartirishlar kiritish toʻgʻrisida»gi OʻRQ-1044-son Qonun imzolandi.
Hujjatga koʻra, elektr energiyasini yetkazib beruvchi qattiq maishiy chiqindilarni toʻplash va olib chiqish хizmatlari uchun majburiy toʻlovlar boʻyicha qarzdorligi mavjud boʻlgan iste’molchilar SMS orqali хabardor qilinganidan keyin mazkur qarzdorlik bartaraf etilguniga qadar ulardan elektr energiyasi uchun toʻlovlarni qabul qilishni vaqtinchalik cheklash huquqiga ega.
Bunda qattiq maishiy chiqindilarni toʻplash va olib chiqish хizmatlarini koʻrsatuvchi tashkilotlar oʻz хizmatlari uchun toʻlovlarni hisob-kitob qilishning ishonchliligi hamda toʻgʻriligi uchun javobgar boʻladi, shuningdek mazkur talablar buzilgan hollarda, iste’molchiga yetkazilgan zararning oʻrnini qoplaydi.
Tegishli oʻzgartirishlar Fuqarolik va Uy-joy kodekslariga, «Raqobat toʻgʻrisida»gi va «Elektr energetikasi toʻgʻrisida»gi qonunlarga kiritildi.
Hujjat Qonun hujjatlari ma’lumotlari milliy bazasida e’lon qilingan va 08.06.2025 yildan kuchga kiradi.
Sobir Nurberdiyev
