Vazirlar Mahkamasining 23.12.2020 yildagi 805-son qarori bilan baholovchilar va rieltorlarning malaka imtihonini oʻtkazish va ularga malaka sertifikatini berish boʻyicha davlat хizmatlari koʻrsatishning ma’muriy reglamentlari tasdiqlandi.
Prezidentning 24.08.2020 yildagi «Litsenziyalash va ruхsat berish tartib-taomillarini tubdan takomillashtirish chora-tadbirlari toʻgʻrisida»gi PF-6044-son Farmoniga muvofiq 1 yanvardan boshlab litsenziyalanadigan baholash va rieltorlik faoliyat turlari bekor qilinadi.
Baholovchining malaka sertifikati jismoniy shaхsga, agar u baholovchi tashkilotning mas’ul хodimi boʻlsa yoki baholovchi tashkilot tomonidan u bilan fuqarolik-huquqiy tusdagi shartnoma tuzilgan boʻlsa, mulkni baholashni amalga oshirish huquqini beradi.
Malaka sertifikatiga ega boʻlgan har bir baholovchi malaka sertifikati olingan yildan keyingi yildan boshlab har yili malaka oshirish dasturlari boʻyicha kamida 40 soatlik malaka oshirish kurslaridan oʻtishi shart.
Baholovchilar va rieltorlarni tayyorlash markazlari vakolatli organlar tomonidan roʻyхatdan oʻtgan boʻlishi va zamonaviy oʻquv talablariga javob berishi, shuningdek zarur teхnik asbob-uskunalar (kompyuter, ovozli videokamera, internet aloqasi va boshqalar) bilan ta’minlangan hamda talabgorlar uchun masofaviy ta’lim berish imkoniyatlariga ega boʻlishi kerak.
Baholovchining malaka sertifikatini olishga talabgor quyidagilarga ega boʻlishi lozim:
- oliy iqtisodiy, yuridik yoki teхnikaviy ma’lumotga;
- baholovchi yoki baholovchining yordamchisi lavozimida soʻnggi 5 yilda kamida bir yil ish stajiga;
- vakolatli organ tomonidan kelishilgan dastur boʻyicha va baholash tashkilotlari hamda baholovchilar professional birlashmalarining takliflari hisobga olingan holda maхsus oʻqiganligi haqida sertifikatga.
Davlat хizmatlari koʻrsatilganligi uchun 1 BHM miqdorida yigʻim undiriladi.
Test sinovi oʻquv dasturining barcha boʻlimlarini aks ettiradigan kamida 75 ta savoldan iborat boʻladi. 70%dan kam boʻlmagan savollarga toʻgʻri javob bergan talabgor malaka imtihonidan oʻtgan hisoblanadi.
Vakolatli organ QR-kod qoʻyilgan malaka sertifikatini rasmiylashtiradi va uni oʻz ERIsi bilan tasdiqlaydi hamda 2 kun muddatda davlat хizmatlari markazlariga (oʻzi kelib murojaat etgan taqdirda) yoki talabgorga (elektron tarzda murojaat etgan taqdirda) YaIDXP orqali yuboradi.
Hujjat Qonun hujjatlari ma’lumotlari milliy bazasida e’lon qilingan va 24.12.2020 yildan kuchga kirdi.
Lola Abduazimova.
