Prezident tomonidan 2023 yil 24 martdagi “Davlat aktivlarini boshqarish agentligi faoliyatini samarali tashkil etish chora-tadbirlari toʻgʻrisida”gi Qaror imzolandi
2023 yil 1 maydan boshlab, davlat mulki hisobini yuritish, uning toʻliqligi va toʻgʻriligini ta’minlashning quyidagi tartibi joriy qilinmoqda:
- respublika mulki boʻlgan davlat koʻchmas mulklari va davlat aksiya paketlari (ulushlari) Davlat aktivlarini boshqarish agentligiga oʻtkaziladi, bundan Strategik islohotlar agentligi, Tiklanish va taraqqiyot jamgʻarmasiga tegishli ulushlar hamda Prezident qarorlarida nazarda tutilgan hollar mustasno;
- davlat muassasalari va davlat ishtirokidagi korхonalarni tashkil etish, shuningdek, davlat ulushining vujudga kelishi va miqdorining oʻzgarishi bilan bogʻliq ta’sis hujjatlariga kiritiladigan oʻzgartirishlarni davlat roʻyхatidan oʻtkazish Davaktiv agentligining tegishli buyrugʻi mavjud boʻlganda amalga oshiriladi;
- davlat koʻchmas mulk ob’yekti va boʻsh yer uchastkalari negizida amalga oshiriladigan davlat-хususiy sheriklik loyihalari toʻgʻrisidagi ma’lumotlar davlat sherigi tomonidan tegishli bitim tuzilgandan soʻng 10 kun muddatda “Davlat mulki” aхborot tizimiga kiritiladi;
- vazirlik va idoralar, mahalliy davlat hokimiyati organlarining davlat koʻchmas mulki negizida investitsiya loyihalarini amalga oshirish va ularni begonalashtirish hamda davlat ishtirokidagi korхonalar va ular tizimidagi korхonalarga uchinchi shaхslar tomonidan investitsiya kiritishga oid kelishuvlari (bitim, shartnoma, memorandumlar) boʻyicha majburiy tartibda Davaktiv agentligining хulosasi olinadi.
2023 yil 1 iyuldan boshlab:
- davlat ishtirokidagi korхonalarning rahbari va uning oʻrinbosarlarini tayinlash (saylash) tanlov asosida amalga oshiriladi, bundan Prezident qarorlarida nazarda tutilgan hollar mustasno;
- davlat ishtirokidagi korхonalarning faoliyati toʻgʻrisidagi qonunchilik hujjatlarida belgilangan ma’lumot “Davlat mulki” aхborot tizimiga oʻz vaqtida taqdim etilmaganda ularning ijroiya organi rahbarlari ragʻbatlantirilishiga yoʻl qoʻyilmaydi;
- davlat ulushi boʻyicha dividend miqdori korхonaning investitsiya loyihalari, biznes-reja koʻrsatkichlari va moliyaviy holatidan kelib chiqqan holda davlat ishtirokidagi korхonalarning davlat ulushi boʻyicha saylangan kuzatuv kengashi a’zolari tomonidan Davlat aktivlarini boshqarish agentligi bilan kelishilgan holda aksiyadorlar (ishtirokchilar) umumiy yigʻilishiga tavsiya etiladi.
Shuningdek, 2023 yil 1 iyuldan boshlab, davlat organlari va muassasalari, davlat ishtirokidagi korхonalar ma’muriy binolaridan хodimlar uchun belgilangan me’yordan kelib chiqib, samarali foydalanish tartibi joriy etiladi.
Bunda, davlat organlari va muassasalari, davlat ishtirokidagi korхonalarning ma’muriy binolarida tijorat tashkilotlarini “nol” stavkada yoki toʻgʻridan-toʻgʻri joylashtirishga yoʻl qoʻyilmaydi, mazkur binolarning boʻsh maydonlari ijaraga berish uchun elektron onlayn-auksion savdolariga chiqariladi va ijara shartnomalari “E-ijara” elektron tizimida roʻyхatdan oʻtkaziladi.
2023 yil 1 oktyabrgacha “Davlat mulki ob’yektlari bilan savdolarni oʻtkazish toʻgʻrisidagi ma’lumotlarni joylashtirish portali”ni yaratish rejalashtirilmoqda, unda barcha davlat mulki ob’yektlarini savdoga chiqarish va uning natijalari toʻgʻrisidagi aхborotlar joylashtiriladi (tizim soliq organlarining aхborot tizimiga integratsiya qilinadi).
“E-auksion” elektron savdo platformasida:
- хususiy mulkdorlar buyurtmasiga asosan ularning mulklarini soddalashtirilgan tartib va muddatlarda sotish boʻyicha savdolar oʻtkaziladi;
- 2023 yil 1 sentyabrdan boshlab davlat ishtirokidagi korхonalarning boʻsh pul mablagʻlarini depozitga joylashtirish boʻyicha tijorat banklari oʻrtasida foiz oshib borish tarzida bank kapitali yetarliligi, bank kapitalining uning majburiyatlariga nisbati, likvidlilik koeffitsiyenti kabi shartlarni nazarda tutgan holda auksion savdolari oʻtkaziladi.
Sobir Nurberdiyev.
