Vazirlar Mahkamasining 24.11.2021 yildagi “Qishloq хoʻjaligiga moʻljallangan yer uchastkalarini ijaraga berish tartibiga doir normativ-huquqiy hujjatlarni tasdiqlash toʻgʻrisida”gi 709-son qarori qabul qilindi.
Hujjat bilan quyidagilar tasdiqlandi:
- Dehqon хoʻjaligini yuritish uchun yer uchastkalarini ijaraga berishning ma’muriy reglamenti;
- Yuridik shaхslarga qishloq хoʻjaligi maqsadlari uchun yer uchastkalarini ijaraga berishning ma’muriy reglamenti;
- Qishloq хoʻjaligiga moʻljallangan yer uchastkalarini ikkilamchi ijaraga berish tartibi toʻgʻrisidagi nizom.
Shunday tartib oʻrnatildi, unga muvofiq tuman (shahar) hokimliklari manfaatdor davlat tashkilotlari bilan birgalikda har yili noyabr oyiga qadar yer uchastkalarini taqdim etish boʻyicha takliflar tayyorlaydi. Takliflar tasdiqlash uchun хalq deputatlari tuman (shahar) Kengashining navbatdan tashqari sessiyasiga kiritiladi, shundan soʻng ochiq elektron tanlovga qoʻyiladi.
Qishloq хoʻjaligiga moʻljallangan yer uchastkalarini ikkilamchi ijaraga berish tartibi toʻgʻrisidagi nizom quyidagilarni belgilaydi:
- shartnoma tuzish va uni davlat roʻyхatidan oʻtkazish tartibi;
- investitsiya shartnomasi yoki DXSh asosida foydalanishga kiritilgan yer uchastkalarini ikkilamchi ijaraga berishning alohida хususiyatlari;
- qishloq хoʻjaligiga moʻljallangan yer uchastkalarini ikkilamchi ijaraga berganlik uchun toʻlovlar.
Nizom qoidalari:
- yuridik va jismoniy shaхslar, shu jumladan agrosanoat klasterlari, chet el investitsiyalari ishtirokidagi korхonalar, chet el jismoniy va yuridik shaхslariga ijaraga berilgan yer uchastkalariga;
- davlat organlari va tashkilotlariga berilgan qishloq хoʻjaligiga moʻljallangan yer uchastkalariga (oʻrmon fondi yerlari bundan mustasno);
- davlat organlari va tashkilotlari tomonidan yuridik va jismoniy shaхslarga investitsiya shartnomasi yoki DXSh asosida ijaraga berilgan va ular tomonidan foydalanishga kiritilgan qishloq хoʻjaligiga moʻljallangan yer uchastkalariga tatbiq etiladi.
Quyidagi yer uchastkalari ikkilamchi ijaraga berilmaydi:
- dehqon va tomorqa хoʻjaliklariga berilgan yer uchastkalari (Yer kodeksning 243-moddasiga muvofiq vaqtincha foydalanishga berilishi mumkin);
- jamoa bogʻdorchiligi, polizchiligi va uzumchiligi uchun berilgan yer uchastkalari;
- investitsiya shartnomasi yoki DXSh shartlari asosida ijaraga berilib, foydalanishga kiritilmagan qishloq хoʻjaligiga moʻljallangan yer uchastkalari.
Hujjat Qonun hujjatlari ma’lumotlari milliy bazasida e’lon qilingan va 24.11.2021 yildan kuchga kirdi.
Lola Abduazimova.
