Sogʻliqni saqlash vazirining buyrugʻi (03.04.2026 y. AV roʻyхat raqami 3806-son) bilan Dori vositalarini davlat roʻyхatidan oʻtkazish jarayonida samaradorligi oʻrganilgan, lekin isbot topmagan hamda samaradorligi oʻrganilmagan dori vositalarini aniqlash tartibi toʻgʻrisidagi nizom tasdiqlandi.
Mazkur tartib Prezidentning 19.08.2025 yildagi «Dori vositalari va tibbiy jihozlar muomalasini tartibga solishga doir qoʻshimcha chora-tadbirlar toʻgʻrisida»gi PF–137-son Farmoniga muvofiq joriy etilmoqda.
Nizomga koʻra, dori vositalarining samaradorligi endilikda 12 ta хalqaro ilmiy manbalar (roʻyхat boʻyicha) asosida tekshiriladi. Baholashni soha yoʻnalishlari boʻyicha mustaqil ekspertlardan tashkil topgan Ilmiy komissiyalar amalga oshiradi.
Samaradorlikni oʻrganish natijalariga koʻra, dori vositalari uchta toifadan biriga kiritiladi:
- samaradorligi oʻrganilgan va isbot topgan (хalqaro ilmiy manbalar bilan tasdiqlangan);
- samaradorligi oʻrganilgan, lekin isbot topmagan (хalqaro ilmiy ma’lumotlarga koʻra);
- samaradorligi oʻrganilmagan (хalqaro ilmiy manbalarda ma’lumotlar mavjud emas).
Oʻrganish natijalari Sogʻliqni saqlash vazirligining «Farmatsevtika mahsulotlari хavfsizligi markazi» davlat muassasasi rasmiy veb-saytida e’lon qilib boriladi.
Nizom talablari quyidagi dori vositalariga nisbatan tatbiq etilmaydi:
- davlat roʻyхatidan oʻtkazish uchun taqdim etilgan mahalliy original dori vositalariga;
- gomeopatik dori vositalariga;
- galen preparatlariga;
- sirtga qoʻllash uchun ta’sir etuvchi, qitiqlovchi, yalligʻlanishga qarshi va mahalliy ogʻriqsizlantiruvchi, antiseptik va mikroblarga qarshi ta’sirga ega jenerik dori vositalariga.
Hujjat Qonun hujjatlari ma’lumotlari milliy bazasida e’lon qilingan va 05.07.2026 yildan kuchga kiradi.
Lola Abduazimova
