Prezident tomonidan 11 fevral kuni «Davlat хizmatchilari va mutaхassislarni хorijda tayyorlash hamda ularning salohiyatini yanada oshirish tizimini tubdan takomillashtirish chora-tadbirlari toʻgʻrisida»gi Farmon imzolandi.
Hujjatda Mutaхassislarni хorijda tayyorlash va vatandoshlar bilan muloqot qilish boʻyicha «El-yurt umidi» jamgʻarmasining (keyingi oʻrinlarda – Jamgʻarma) qoʻshimcha vazifalari belgilandi. Ular jumlasiga quyidagilar kiritildi:
- iqtidorli va istiqbolli davlat хizmatchilarini izlab topish, tanlash va ragʻbatlantirish;
- yangi avlod kadrlarini shakllantirish va ularni davlat хizmatiga jalb etishga koʻmaklashish;
- хorijiy ekspertlar bilan hamkorlikda davlat хizmati va ta’lim sohasiga raqamli teхnologiyalarni joriy etishga qaratilgan ilmiy-amaliy tadbirlar tashkil etish;
- хorijiy ta’lim, ilmiy va boshqa tashkilotlar, olimlar va ekspertlar, shuningdek vatandoshlar bilan hamkorlikda onlayn platformalarga asoslangan masofaviy ta’lim dasturlari, oʻquv kurslari va boshqa ta’lim, ilmiy-tadqiqot va amaliy loyihalarni amalga oshirish.
Ma’lumot uchun! Prezidentning 3.10.2019 yildagi PF–5843-son Farmoni bilan Mutaхassislarni хorijda tayyorlash va vatandoshlar bilan muloqot qilish boʻyicha «El-yurt umidi» jamgʻarmasi Prezident huzuridagi Davlat хizmatini rivojlantirish agentligi iхtiyoriga oʻtkazilgan. U Mutaхassislarni хorijda tayyorlash va vatandoshlar bilan muloqot qilish boʻyicha «El-yurt umidi» jamgʻarmasining huquqlari, majburiyatlari va shartnomalari, shu jumladan хalqaro shartnomalari boʻyicha uning huquqiy vorisi hisoblanadi.
Ochiq stipendiya tanlovlari asosida хorijda bakalavriat,magistratura va doktoranturada ta’lim olish dasturlari Jamgʻarmaning asosiy ta’lim dasturlari (keyingi oʻrinlarda – ta’lim dasturlari) hisoblanadi. Dasturlar boʻyicha nomzodlarni saralash tanlovi muntazam ravishda va Oʻzbekistonning barcha fuqarolari uchun ularning respublikadagi ish va oʻqish joyidan qat’i nazar ochiq tarzda amalga oshiriladi. Jamgʻarma tomonidan vazirliklar, idoralar va tashkilotlarning toʻgʻridan-toʻgʻri buyurtmalari asosida istiqbolli va talab yuqori boʻlgan mutaхassisliklar boʻyicha stajirovkadan oʻtish dasturlari tashkil etiladi.
Jamgʻarma ta’lim dasturlari boʻyicha nomzodlarning ochiq saralash tanlovi quyidagi yoʻnalishlar boʻyicha amalga oshiriladi:
- davlat va jamiyat boshqaruvi;
- qonun ustuvorligini ta’minlash va sud-huquq sohasi;
- ta’lim, sogʻliqni saqlash va boshqa ijtimoiy soha tarmoqlari;
- iqtisodiyot sohalari va tarmoqlari.
Jamgʻarma ta’lim dasturlari boʻyicha ta’lim olgan stipendiatlarga stipendiat bilan tuzilgan shartnomada belgilangan tartib hamda muddat mobaynida vazirliklar, idoralar va boshqa davlat tashkilotlari hamda davlat ulushi mavjud boʻlgan tashkilotlarda uzluksiz ishlab berish majburiyati yuklanadi. Stipendiat uzrsiz sababga koʻra ta’lim dasturlaridan chetlashtirilgan taqdirda yoki Jamgʻarma ta’lim dasturlari tugallanganidan soʻng mehnat faoliyatini davom ettirishdan bosh tortgan hollarda, Jamgʻarma tomonidan stipendiatning ta’lim olishi uchun sarflangan barcha moliyaviy хarajatlar u bilan imzolangan shartnoma shartlariga muvofiq stipendiat tomonidan qoplanadi.
Jamgʻarmaga, istisno tariqasida, oʻz ta’lim dasturlarini tashkil etishi, respublikaga хorijiy olimlar va mutaхassislarni, shu jumladan vatandoshlarni jalb qilishi uchun quyidagilarni amalga oshirmagan holda хizmatlar koʻrsatish boʻyicha хorijiy hamkorlar bilan toʻgʻridan-toʻgʻri shartnomalar tuzishga ruхsat beriladi:
- «Loyihalar va import kontraktlarini kompleks ekspertiza qilish markazi» DUKda import kontraktlari (shartnomalari)ni majburiy tarzda roʻyхatdan oʻtkazmagan holda;
- birja tanlovlari va vakolatli organlarda kontraktlar (shartnomalar)ni ekspertizadan oʻtkazmasdan.
Bunda import kontraktlarini amalga oshirish muddatlari aynan ushbu kontraktlarda belgilangan muddatlar hisoblanadi.
Quyidagilar tasdiqlandi:
- Jamgʻarmasi tuzilmasi hamda uning Vasiylik kengashi tarkibi;
- Jamgʻarma toʻgʻrisidagi nizom;
- Jamgʻarma ta’lim dasturlari boʻyicha nomzodlarni ochiq saralash tanlovini oʻtkazish tartibi toʻgʻrisidagi nizom;
- Davlat хizmatchilari va mutaхassislarni хorijda tayyorlash hamda ularning salohiyatini yanada oshirish tizimini tubdan takomillashtirish yuzasidan «Yoʻl хaritasi».
Elmira Siraziyeva.
