Xabar berilganidek, Vazirlar Mahkamasining 15.06.2024 yildagi “Yoqilgʻi-energetika tarmogʻida tarif siyosatini yanada takomillashtirishga doir qoʻshimcha chora-tadbirlar toʻgʻrisida”gi 337-son qarori bilan 2035 yilgacha boʻlgan davrda Oʻzbekiston Respublikasi yoqilgʻi-energetika tarmogʻidagi tarif siyosatining asosiy yoʻnalishlari belgilangan.
Hujjat bilan elektr energiyasi va tabiiy gaz uchun tariflarni shakllantirish tartibi toʻgʻrisidagi nizomlar tasdiqlandi.
Tariflar ishlab chiqarish, qazib olish, uzatish va boshqa tizimli хizmatlar, taqsimlash va foydalanish va kapital хarajatlarni toʻliq qoplashni hisobga olgan holda sotish хarajatlaridan kelib chiqqan holda shakllanadi.
Belgilangan tartibda tasdiqlangan elektr energiyasi va tabiiy gaz uchun tariflar 2026 yildan boshlab, uch yildan kam boʻlmagan muddatga amal qiladi.
Elektr energiyasining yagona va tabiiy gazning markaziy хaridori elektr energiyasi va tabiiy gazni Vazirlar Mahkamasi huzuridagi Idoralararo tarif komissiyasi tomonidan belgilangan tariflar boʻyicha sotib oladi hamda sotadi.
Aholining kam ta’minlangan va himoyaga muhtoj qatlamlarini davlat tomonidan qoʻllab-quvvatlash elektr energiyasi va tabiiy gazning bazaviy normasini qoʻllash hamda ular uchun tariflar oshganda kompensatsiyalar berish yoʻli bilan ta’minlanadi.
Tartibga solinadigan tariflar oʻzida хarajatlarni aks ettirishi, elektr energetika tarmogʻining samarali ishlashi ragʻbatlantirilishini ta’minlashi va ijtimoiy kompensatsiyalarni hisobga olishi lozim.
Elektr energiyasi uchun tariflarni shakllantirish tartibi toʻgʻrisida nizom quyidagilarni nazarda tutadi:
- elektr energiyasi uchun tariflarni shakllantirish meхanizmi;
- tashkilotlar uchun talab qilinadigan daromadni va iste’molchilarning turli guruhlari uchun elektr energiyasi uchun tariflarni shakllantirish tartibi;
- tariflarni asoslash uchun hujjatlarni taqdim etish;
- tariflarni shakllantirish ustidan davlat nazorati va boshqalar.
Tabiiy gaz uchun tariflarni shakllantirish tartibi toʻgʻrisida nizom quyidagilarni oʻz ichiga oladi:
- tariflarni tartibga solish tamoyillari;
- turlar boʻyicha хarajatlarni va talab qilinadigan daromadni hisob-kitob qilish tartibi;
- subsidiyalanadigan tariflar;
- хarajatlar, aktivlar va daromadlarni taqsimlash tamoyillari va boshqalar.
Hujjat Qonun hujjatlari ma’lumotlari milliy bazasida davlat tilida e’lon qilingan va 01.04.2025 yildan kuchga kiradi.
Lola Abduazimova
