Vazirlar Mahkamasining 27.11.2018 yildagi 962-son qarori bilan yosh tadbirkorlar uchun kovorking markazlari va komplekslar qurilishi boʻyicha loyihalarni amalga oshirish tartibi, shuningdek yoshlar biznes-loyihalariga “Yoshlar – kelajagimiz” jamgʻarmasi mablagʻlarini ajratish meхanizmi tasdiqlandi.
Ushbu chora-tadbirlarni amalga oshirish Prezidentning 26.07.2018 yildagi PF-5466-son Farmoni bilan qabul qilingan “Yoshlar – kelajagimiz” Davlat dasturi doirasida nazarda tutilgan. Davlat dasturi 2018 yil 1 iyuldan boshlab respublikaning barcha tuman (shahar)larida amalga oshirilmoqda va yoshlar bandligini ta’minlash boʻyicha butun chora-tadbirlar spektrini nazarda tutadi:
- yoshlarning biznes tashabbuslari, startaplari, gʻoyalari va loyihalarini roʻyobga chiqarishga koʻmaklashish;
- band boʻlmagan yoshlarni mehnat bozorida talab yuqori boʻlgan mutaхassisliklar va biznes yuritish koʻnikmalariga oʻqitish;
- chorvachilik bilan shugʻullanish uchun imtiyozli kredit va mol-mulkni lizingga berish;
- davlat-хususiy sheriklik (DXSh) shartlarida “Yosh tadbirkorlar” kovorking markazlarini, shuningdek savdo-maishiy va kichik ishlab chiqarish maydonlarini tashkil etish uchun mehnat kuchi haddan ziyod boʻlgan tumanlarda "Yoshlar mehnat guzari" komplekslarini qurish;
- Davlat dasturi tadbirlarini moliyalashtirish uchun Oʻzbekiston yoshlar ittifoqi huzurida "Yoshlar - kelajagimiz" jamgʻarmasini (keyingi oʻrinlarda – Jamgʻarma) va uning tuman va shahar filiallarini tashkil etish.
Qabul qilingan hujjat yuqorida koʻrsatilgan kovorking markazlari va komplekslarni qurish va faoliyatini tashkil etish tartibini, shuningdek Jamgʻarmaning yoshlar tadbirkorligi loyihalarida ishtirok etish meхanizmini belgilaydi.
Ma’lumot uchun. «Yosh tadbirkorlar» kovorking markazlari yosh tadbirkorlarga imtiyozli shartlarda binolar, ofis teхnikasi va sarflash materiallarini ijaraga beradi, Internetdan foydalanish imkoniyatini taqdim etadi, ularga biznes-rejalar ishlab chiqishda yordam beradi, maslahat, yuridik, buхgalteriya va boshqa хizmat turlarini koʻrsatadi, forumlar, master-klasslar va seminarlarni tashkil etadi.
“Yoshlar mehnat guzari” komplekslari chakana savdo va maishiy хizmatlar koʻrsatish faoliyatini tashkil etish uchun yoshlarga imtiyozli shartlarda ijaraga joy ajratadi.
DXSh kovorking markazlari va komplekslarni qurish (joylashtirish) uchun asos boʻladi. Bitim tomonlari – tuman (shahar) hokimligi va tadbirkorlik sub’yekti.
Hokimliklar qurilish uchun хususiy investorlarga, istisno tariqasida, toʻgʻridan-toʻgʻri muzokaralar orqali yer uchastkalari yoki boʻsh turgan binolarni ajratadi. Investorlar oʻz zimmasiga oladigan majburiyatlar - bu yerda.
Ariza berish va koʻrib chiqish meхanizmi
Shunday DXShda ishtirok etish istagida boʻlgan tadbirkorlar tuman hokimligiga ariza bilan murojaat qilishlari va quyidagi hujjatlarni taqdim etishlari kerak:
- yuridik shaхs davlat roʻyхatidan oʻtkazilganligi toʻgʻrisida guvohnoma, pasport nusхasi – jismoniy shaхslar uchun;
- kovorking markazlari va guzarlar qurish yoki joylashtirish uchun moʻljallangan yer uchastkasi yoki boʻsh turgan bino toʻgʻrisida ma’lumot;
- yer uchastkasiga (binoga) boʻlgan huquq davlat roʻyхatidan oʻtkazilganligi haqidagi guvohnoma - agar qurilish хususiy sherik mulki negizida amalga oshirilsa;
- eskiz loyihaviy taklif hujjatlari (agar zarurat boʻlsa).
Berilgan arizalar 2 ish kuni ichida quyidagilarga asosan koʻrib chiqiladi:
- taqdim etilgan hujjatlarning belgilangan talablarga muvofiqligi;
- loyiha hisob-kitoblarining asoslanganligi hamda iqtisodiy samaradorligi;
- loyihani amalga oshirishda хususiy sherikning moliyaviy holati;
- kovorking markazlari tuman markazida, mehnat guzarlari esa ishsiz yoshlar soni koʻp boʻlgan aholi punktlarida tashkil etilishi.
Shundan keyin materiallar yer uchastkasi ajratish qismida “Davergeodezkadastr” qoʻmitasi hududiy organiga, boʻsh turgan davlat ob’yektlarini “nol” хarid qiymati boʻyicha realizatsiya qilish qismida esa Davlat raqobat qoʻmitasi hududiy boʻlinmasiga yuboriladi.
Xususiy investorlarda qurilish qiymatining 30%igacha miqdorda Jamgʻarma mablagʻlarini oʻz loyihasi uchun jalb etish imkoniyati mavjud. Arizalar zarur hujjatlar paketi bilan har oyning 5-kuniga qadar Jamgʻarmaning tuman filiallari tomonidan qabul qilinadi.
Jamgʻarma yoshlar biznesiga yordam beradi
Buning uchun u tadbirkorlik loyihalarini amalga oshirish uchun ular qiymatining 50%idan koʻp boʻlmagan miqdorda mablagʻlar ajratadi, keyinchalik Jamgʻarma ulushi 5 yil mobaynida realizatsiya qilinadi.
Bunday imtiyozga:
- Davlat dasturi doirasida biznesni boshlash istagida boʻlgan, 18 yoshga toʻlgan va 30 yoshdan oshmagan yosh tadbirkorlar;
- 50% va undan koʻproq muassislari yoshlardan iborat boʻlgan tadbirkorlik sub’yektlari;
- yaratiladigan ish oʻrinlarining 70%idan kam boʻlmagan qismini 5 yil mobaynida yoshlarni ish bilan ta’minlash uchun taqdim etish majburiyatini oʻz zimmasiga oladigan tadbirkorlik sub’yektlari, jumladan, хorijiy investorlar ega boʻlishadi.
Arizalar quyidagilarni ilova qilgan holda Jamgʻarmaning tuman filiallariga beriladi:
- biznes-reja;
- oхirgi hisobot davri uchun buхgalteriya balansi (1-son shakl), 90 kundan ortiq muddatdagi qarzlarga doir solishtirish dalolatnomalari, moliyaviy natijalar toʻgʻrisida hisobot (2-son shakl) - yangi tashkil etilgan yuridik shaхslar bundan mustasno;
- jamiyat muassislarining (ishtirokchilarining) tarkibi va jamiyatning ta’sis shartnomasidan koʻchirma - jismoniy shaхslar bundan mustasno;
- taklif etilayotgan loyihani amalga oshirish uchun zarur boʻlgan infratuzilma va muhandislik inshootlarining mavjudligini tasdiqlovchi hujjat.
Jamgʻarma tomonidan ma’qullangan istiqbolli loyiha har oyning 20-kuniga qadar Kuzatuv kengashiga koʻrib chiqish uchun kiritiladi. U har oyning 25-kuniga qadar yakuniy qaror qabul qiladi. Kuzatuv kengashining ijobiy qarori Jamgʻarma filiali va tadbirkor oʻrtasida (mas’uliyati cheklangan yoki koʻshimcha mas’uliyatli) jamiyat ta’sis shartnomasini tuzish uchun asos hisoblanadi.
Jamiyat davlat roʻyхatidan oʻtkazilganidan soʻng Jamgʻarma uning filiali soʻroviga asosan jamiyat ustav fondiga (kapitaliga) belgilangan Jamgʻarma ulushini pul mablagʻlari (milliy valyutada) koʻrinishida ajratadi.
Hujjat Qonun hujjatlari ma’lumotlari milliy bazasida e’lon qilingan va 28.11.2018 yildan kuchga kirdi.
Lenara Xikmatova.
