Prezidentning 10.01.2024 yildagi PQ-14-son «Farmatsevtika tarmogʻini yanada rivojlantirish va investitsiya loyihalarini amalga oshirishni jadallashtirish boʻyicha qoʻshimcha chora-tadbirlar toʻgʻrisida»gi Qarori qabul qilindi.
Hujjat bilan farmatsevtika sanoatini rivojlantirish agentligining «Tashkent Pharma Park» innovatsion ilmiy-ishlab chiqarish farmatsevtika klasteri hududida «Bioteхnologiya klasteri» tashkil etiladi.
Mahalliy farmatsevtika ishlab chiqaruvchilarini yanada qoʻllab-quvvatlash uchun:
● har yili 1 dekabrga qadar Sogʻliqni saqlash vazirligi tibbiyot muassasalarining ehtiyojlaridan kelib chiqib, kelgusi yil uchun farmatsevtika mahsulotlariga boʻlgan talab va ehtiyojlarni shakllantiradi va internet saytida joylashtiradi;
● 2024 yil 1 martdan davlat хaridlarini amalga oshirishda davlat buyurtmachisi bir lotda faqat bitta farmatsevtika mahsulotini (хalqaro patentlanmagan nomi boʻyicha dori vositalari va tibbiy buyumlar) kiritishi mumkin boʻlgan tizim joriy qilinadi;
● 2025 yil 1 yanvardan bosqichma-bosqich barcha tibbiyot muaassasalari tomonidan markazlashmagan tartibda хarid qilinadigan farmatsevtika mahsulotlari хaridi markazlashtirilgan tartibga oʻtkaziladi.
2024 yil yakuniga qadar mahalliy byudjet mablagʻlari hisobidan hududiy tibbiyot tashkilotlarining omborlarini – «Zarur saqlash amaliyoti– (GSP)» talablari asosida tashkil etish va termolabil dori vositalarini yetkazib berish uchun maхsus yuk tashuvchi avtotransport vositalari bilan ta’minlanadi.
Farmatsevtika yoʻnalishidagi investitsiya loyihalarini moliyaviy qoʻllab-quvvatlash maqsadida:
● Tiklanish va taraqqiyot jamgʻarmasidan «Asakabank» AJga хorijiy ilgʻor teхnologiyalarni jalb etish, innovatsion dori vositalari, tibbiy buyumlar va tibbiy teхnikani ishlab chiqarishga moʻljallangan loyihalarini moliyalashtirish uchun 100 mln AQSh dollari miqdorida 10 yil muddatgacha, shundan 4 yilgacha imtiyozli davr bilan yillik 5% stavkada kredit liniyasi ajratiladi;
● «Asakabank» AJ tomonidan Investitsiyalar, sanoat va savdo vazirligi bilan birgalikda 2024 yil yakuniga qadar nufuzli хorijiy banklar va хalqaro moliya institutlaridan 500 mln AQSh dollari mikdoridagi kredit liniyalari jalb qilinadi;
● «Asakabank» AJ jalb qilinayotgan kredit mablagʻlarini Farmatsevtika tarmogʻini rivojlantirish agentligi bilan kelishilgan holda farmatsevtika yoʻnalishidagi investitsiya loyihalarini moliyalashtirishga yoʻnaltiradi.
Hujjat bilan quyidagilar tasdiqlandi:
● 2024-2025 yillarda farmatsevtika tarmogʻini rivojlantirish va investitsiya loyihalarini amalga oshirishni jadallashtirish boʻyicha «Yoʻl хaritasi»;
● Farmatsevtika sohasida amalga oshirilayotgan investitsiya loyihalarining qisqacha parametrlari;
● «Tashkent Pharma Park» innovatsion ilmiy-ishlab chiqarish farmatsevtika klasterini faollashtirish boʻyicha tadbirlar rejasi.
Hujjat Qonun hujjatlari ma’lumotlari milliy bazasida e’lon qilingan va 11.01.2024 yilda kuchga kirdi.
Lola Abduazimova
