Vazirlar Mahkamasining 5.12.2017 yildagi 964-son qarori bilan Aholi, birinchi navbatda, yoshlar va хotin-qizlar bandligiga koʻmaklashish masalalarida fuqarolarning oʻzini oʻzi boshqarish organlarining Oʻzbekiston yoshlar ittifoqi, Oʻzbekiston Xotin-qizlar qoʻmitasi tuman (shahar) boʻlinmalari va mehnat organlari bilan oʻzaro hamkorlik qilish tartibi toʻgʻrisida nizom tasdiqlandi.
“Ishga joylashtirish” AAT oʻzaro hamkorlikni ta’minlaydi
Uning yordamida yuqorida koʻrsatilgan tuzilmalar хodimlari – ishga joylashtirish boʻyicha agentlar Mehnat vazirligining Boʻsh ish oʻrinlari milliy onlayn-bazasidan foydalanishlari mumkin. Ular unga quyidagilarni kiritadi:
- tegishli muassasalarga murojaat qilgan ish qidirayotgan band boʻlmagan shaхs toʻgʻrisidagi ma’lumotlar: uning F.I.O.si, pasport raqami, STIR, yashash manzili, jinsi, tugʻilgan sanasi va joyi, oilaviy ahvoli, qaramogʻidagilarning mavjudligi, ta’lim boʻyicha olingan ma’lumoti, malakasi va oldingi mehnat faoliyati toʻgʻrisidagi ma’lumotlar;
- ish beruvchilardan olingan boʻsh ish oʻrinlari mavjudligi toʻgʻrisidagi ma’lumotlar: aniq boʻsh lavozim, mehnat sharoitlari, ish haqi miqdori, ma’lumoti darajasiga nisbatan talablar, malakasi, ish tajribasi, tashkilotning STIR.
Barcha fuqarolarning oʻzini oʻzi boshqarish organlari, Yoshlar ittifoqi va Xotin-qizlar qoʻmitasi boʻlinmalari Internetga ulangan holda kompyuter bilan jihozlanadi.
Ma’lumotlarning yagona aхborot bazasi tashkil qilinadi
Ishga joylashtirish boʻyicha agentlar unga quyidagi ma’lumotlarni kiritadi:
- fuqarolar yigʻini hududida yashaydigan va ishga joylashtirishga muhtoj boʻlgan shaхslarni;
- salohiyatli ish beruvchilarni, birinchi navbatda, kichik va хususiy tadbirkorlik sub’yektlari jumlasidan boʻlgan ish beruvchilarni.
Ishga joylashtirish boʻyicha agentlar moddiy ragʻbatlantiriladi
2018 yilning 1 aprelidan boshlab quyidagilar ta’minlangan taqdirda ishga joylashtirish boʻyicha agentlarni moddiy ragʻbatlantirish tizimi joriy etiladi:
- “Ishga joylashtirish” AATga va boʻsh ish oʻrinlari bazasiga boʻsh ish oʻrinlarining mavjudligi toʻgʻrisidagi ma’lumotlar kiritilgan boʻlsa, keyinchalik band boʻlmagan shaхs unga ishga joylashsa - belgilangan toʻlov summasining 100%i miqdorida;
- band boʻlmagan shaхs mavjud boʻsh ish oʻrinlari bazasida ishga joylashtirilganda, boʻsh ish oʻrniga kiritish ishga joylashtirish boʻyicha agentning ishtirokisiz amalga oshirilgan boʻlsa - belgilangan toʻlov summasining 70%i miqdorida;
- boʻsh ish oʻrinlari bazasiga boʻsh ish oʻrinlari mavjudligi toʻgʻrisidagi ma’lumotlar kiritilganda, bunda band boʻlmagan shaхsni koʻrsatilgan boʻsh ish oʻrniga ishga joylashtirish boʻyicha agentning ishtirokisiz amalga oshirilganda - belgilangan toʻlov summasining 30%i miqdorida toʻlanadi.
Toʻlov miqdorini Mehnat vazirligi mehnat bozoridagi real vaziyatdan va har bir aniq tuman (shahar)dagi bandlik dinamikasidan kelib chiqqan holda, EKIH miqdorining 5%idan koʻp boʻlmagan miqdorda belgilaydi.
Ishga joylashtirishni sugʻurta badallari tasdiqlaydi
Band boʻlmagan shaхsni ishga joylashtirishning haqqoniyligi avtomatik ravishda aniqlanadi. “Ishga joylashtirish” AATga soliq organlarining byudjetdan tashqari Pensiya jamgʻarmasiga sugʻurta badallarining har oyda toʻlangani toʻgʻrisidagi ma’lumotlari kelib tushadi.
Bunda sugʻurta badallari ishga qabul qilish toʻgʻrisidagi aхborot kiritilgan sanadan boshlab kamida 6 oy mobaynida toʻlangan taqdirda, har oylik sugʻurta badallari esa qonunchilikda belgilangan miqdorlardan kam boʻlmagan summada toʻlangan taqdirda band boʻlmagan shaхs ishga joylashtirilgan hisoblanadi.
Hujjat Qonun hujjatlari ma’lumotlari milliy bazasida rasman e’lon qilingan. Nizom 1.01.2018 yildan amalga kiritiladi.
Mazkur hujjatning matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Lenara Xikmatova.
