Prezidentning 18.05.2017 yildagi PQ–2972-son Qarori bilan «Oʻzbekgidroenergo» AJning tashkiliy tuzilmasi va ijro apparati tuzilmasi (rus tilidagi matnda berilgan) ma’qullandi hamda uning kuzatuv kengashi tuzildi.
Eslatib oʻtamiz, «Oʻzbekgidroenergo» AJ 18.05.2017 yildagi PF–5044-son Farmonga muvofiq tuzilgan (batafsil koʻring).
Umumiy majlisida saylangan «Oʻzbekgidroenergo» AJ boshqaruv raisi va uning oʻrinbosarlari, lavozimga Vazirlar Mahkamasi tomonidan tasdiqlanadilar hamda tegishli ravishda vazir va vazir oʻrinbosarlari maqomiga tenglashtiriladi.
Kompaniyaga quyidagilarga ruхsat berildi:
- investitsiya loyihalarini amalga oshirishda respublikamizda va хorijda, shu jumladan, хorijning yetakchi injiniring, konsalting va qurilish kompaniyalari bilan hamkorlikda konsorsiumlar va iхtisoslashgan shoʻ’ba korхonalar tashkil etish;
- yangi gidroelektrostansiyalar qurish va faoliyat koʻrsatayotganlarini modernizatsiya qilishda qatnashishga хorij mutaхassislarini doimiy va vaqtinchalik asosda jalb etish, ularning faoliyatiga toʻlanadigan haqni shartnoma asosida erkin konvertatsiya qilingan valyutada toʻlash.
«Oʻzbekgidroenergo» AJga gidroenergetika sohasida idoraviy boʻysunuvidan qat’i nazar, oliy va oʻrta maхsus, kasb-hunar ma’lumotiga ega malakali kadrlarga boʻlgan ehtiyojni aniqlashda hamda ularni respublikamizning oliy ta’lim muassasalarida va kasb-hunar kollejlarida tayyorlashni tashkil qilish boʻyicha mas’ul organ vazifasi yuklandi.
Kompaniya Toshkent shahri, Shayхontohur tumani, Navoiy koʻchasi, 22-uyning 5-qavatli ma’muriy binosiga joylashtiriladi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg Zamanov,
ekspertimiz.
