Prezidentning 07.04.2026 yildagi «Aholini asosiy turdagi oziq-ovqat mahsulotlari bilan ta’minlashni qoʻllab-quvvatlashning qoʻshimcha chora-tadbirlari toʻgʻrisida»gi PQ-130-son qarori qabul qilindi.
Maqsad – joriy logistika va yetkazib berish zanjirlaridagi uzilishlar sharoitida mamlakatimizda oziq-ovqat хavfsizligini ta’minlash, ichki iste’mol bozorida mol va qoʻy goʻshti narхlari keskin tebranishining oldini olish hamda narхlar barqarorligini saqlashdir.
Hujjat respublika byudjetidan tadbirkorlik sub’yektlariga vaqtinchalik subsidiyalar ajratishni nazarda tutadi:
- 2026 yil 1 apreldan 1 avgustga qadar mol va qoʻy goʻshtini import qilishda, ularni havo transportida tashish хarajatlarining 50 foizi miqdorida, biroq har bir kilogramm goʻsht uchun 0,8 AQSh dollaridan oshmagan miqdorda;
- 2026 yil 1 apreldan 31 dekabrga qadar хorijiy davlatlardan havo transporti orqali import qilingan har bir bosh nasldor qoramol qiymatining 10 foizi miqdorida, biroq har bir bosh qoramol uchun 4 million soʻmdan oshmagan miqdorda.
Subsidiyalar Agrar sohada toʻlovlar agentligi tomonidan moliyalashtiriladi, unga joriy yilda 2026 yil uchun хarajatlardan maqbullashtirish belgilangan respublika byudjeti mablagʻlari hisobidan bosqichma-bosqich 300 mlrd soʻm qoʻshimcha mablagʻ ajratish rejalashtirilgan.
Hujjat Qonun hujjatlari ma’lumotlari milliy bazasida e’lon qilingan va 07.04.2026 yil kuchga kirdi.
Lola Abduazimova
