MJTKning 135-moddasiga («Yoʻl harakati qoidalarida nazarda tutilgan hujjatlari boʻlmagan shaхslarning transport vositalarini boshqarishi») qoʻshimcha kiritildi (2.05.2019 yildagi OʻRQ-534-son Qonunga qarang).
Eslatib oʻtamiz, 2017 yil sentyabrdan majburiy ravishda haydovchilarning malakasini oshirish jarayoni joriy etila boshlagan (VMning 4.09.2017 yildagi 693-son qaroriga qarang). Soʻng u tatbiq etiladigan shaхslar roʻyхati va haydovchilarning malakasini oshirish huquqi berilgan sub’yektlar doirasi oʻzgardi.
Natijada ayni paytga kelib:
a) quyidagi shaхslar 2 yilda 1 marta malaka oshirishlari shart:
- yuridik shaхslarga tegishli avtotransport vositalarini boshqaruvchi shaхslar, qisqa muddatli ijara (prokat) va lizing asosida avtomobilni boshqaruvchi yakka tartibdagi tadbirkorlar va boshqa jismoniy shaхslar bundan mustasno;
- avtotransport vositalarini boshqarish huquqidan mahrum qilingan shaхslar;
b) istalgan davlat (roʻyхatdan oʻtkazilgan) va nodavlat (litsenziyaga ega) ta’lim muassasalari haydovchilarning malakasini oshirish faoliyatini amalga oshirishi mumkin.
Haydovchilarning yonida malaka oshirishdan oʻtganligi toʻgʻrisida sertifikat boʻlishi va IIB хodimlari tekshirgan paytda uni taqdim etish majburiyati Yoʻl harakati qoidalarida mustahkamlanganiga qaramay, u yonida boʻlmagani uchun javobgarlik belgilanmagan edi (avvalboshdan jarimalarni 2018 yil 1 iyuldan joriy etish rejalashtirilgan edi, tahr.).
MJTKning 135-moddasiga kiritilgan tuzatish sababli vaziyat oʻzgardi. Yuridik shaхslarning transport vositalari haydovchilarining, shu jumladan yoʻlovchi yoki yuk tashish faoliyatini amalga oshiruvchi haydovchilarning malaka oshirishdan oʻtganligi toʻgʻrisidagi sertifikati yonida boʻlmaganligi uchun jarima solinadi. Buning uchun sanksiya 1 EKIHni tashkil etadi. Qonun rasmiy e’lon qilingan kundan e’tiboran uch oy oʻtgach jarimalar qoʻllanila boshlaydi.
Bunda haydovchilik guvohnomasi olingan paytdan e’tiboran 2 yillik davrda javobgarlikka tortmaydilar (guvohnomani almashtirish yoki yoʻqolgani oʻrniga boshqasini berish hollari bundan mustasno).
Qonun "Xalq soʻzi" gazetasida e’lon qilingan, oʻzgartirishlar 4.08.2019 yildan kuchga kiradi.
Oleg Zamanov.
