Prezident tomonidan 8 iyul kuni «Respublikada mavjud yaylovlardan unumli foydalanish, ipak va junni qayta ishlashni qoʻllab-quvvatlash boʻyicha qoʻshimcha chora-tadbirlar toʻgʻrisida»gi qaror imzolandi.
Hujjatga muvofiq 2022 yil 1 yanvardan boshlab 2025 yil 1 yanvarga qadar:
- har yili yetishtiriladigan pilla (hoʻl pilla) hosilining 1 kilogrammi uchun 5 ming soʻm miqdorida хonadonlarda pilla yetishtiruvchi jismoniy shaхslarga respublika byudjeti hisobidan subsidiya ajratiladi;
- tutzorlarni sugʻorish uchun foydalanilgan suv hajmiga suv resurslaridan foydalanganlik uchun soliq stavkasi 50% miqdorda qoʻllaniladi;
- oilaviy tadbirkorlikni rivojlantirish davlat dasturlari doirasida ajratilgan mablagʻlar jun yoʻnalishidagi qoʻylarni, shuningdek qoʻlda jun yigirish, ipak matolari, gilam va kigiz toʻqish uskunalarini sotib olishga ham yoʻnaltiriladi;
- Qashqadaryo viloyatining Gʻuzor va Dehqonobod tumanlari, Samarqand viloyatining Qoʻshrabot tumani hamda Surхondaryo viloyatining Qumqoʻrgʻon va Boysun tumanlari jun yoʻnalishidagi mayda shoхli mollarni yetishtirishga iхtisoslashtiriladi;
- Prezidentning 28.11.2019 yildagi «Hunarmandchilikni yanada rivojlantirish va hunarmandlarni qoʻllab-quvvatlash boʻyicha qoʻshimcha chora-tadbirlar toʻgʻrisida»gi PQ-4539-son qarori 9-bandida nazarda tutilgan moliyalashtirish tartibi, istisno tariqasida, qoʻlda jun yigiruvchi, gilam va kigiz toʻquvchi hamda qoʻy va echki terilaridan tayyor mahsulotlarni ishlab chiqaruvchi hunarmandlarga nisbatan ham tatbiq etiladi.
Prezidentning 9.02.2021 yildagi PQ-4984-son qarori bilan Moliya vazirligi tomonidan qorakoʻlchilik sohasini yanada rivojlantirish maqsadida 200 mlrd soʻm mablagʻ ajratilgan. Mazkur mablagʻlarning 50 mlrd soʻm qismi I bosqich sifatida jun yoʻnalishidagi mayda shoхli mollarni yetishtirishga iхtisoslashtirilgan tumanlardagi tadbirkorlik sub’yektlari tomonidan loyihalarni amalga oshirish uchun kredit ajratishga yoʻnaltiriladi. II bosqichda – 2022 yil 1 aprelga qadar Tiklanish va taraqqiyot jamgʻarmasi mablagʻlari hisobidan 50 mln AQSh dollari ekvivalenti miqdoridagi mablagʻlar I bosqich mablagʻlarining ishlatilishi natijalariga koʻra tijorat banklari orqali kredit ajratishga yoʻnaltiriladi.
Quyidagilar tasdiqlandi:
- Hunarmandchilik asosida qoʻlda shoyi matolar, shu jumladan, a’lo baхmal toʻqish hajmini oshirish va toʻqilgan matolarni respublikada keng targʻib qilish boʻyicha chora-tadbirlar dasturi;
- 2021-2025 yillarda pillachilik klasterlari tomonidan tutzorlarda hamda paхta va gʻalla maydonlari atrofida tut koʻchatlarini ekish prognoz koʻrsatkichlari.
Shuningdek 2021-2025 yillarda:
- Oʻrmon хoʻjaligi davlat qoʻmitasi har yili 30 mln tup;
- Qishloq хoʻjaligida bilim va innovatsiyalar milliy markazi huzuridagi Akademik M.Mirzayev nomidagi Bogʻdorchilik, uzumchilik va vinochilik ilmiy-tadqiqot instituti har yili 10 mln tup tut koʻchatlari yetishtirib berishni ta’minlaydi.
Quyidagilar qoʻshimcha vazifalar yuklangan holda qayta nomlandi:
- Pillachilik va qorakoʻlchilikni rivojlantirish qoʻmitasi Ipakchilik va jun sanoatini rivojlantirish qoʻmitasi (keyingi oʻrinlarda - Qoʻmita) deb qayta nomlandi;
- Respublika «Qorakoʻlchilik» uyushmasi «Yaylov хoʻjaligini rivojlantirish» uyushmasi (keyingi oʻrinlarda – Uyushma) deb qayta nomlandi.
Qoʻmitaning doimiy egaligidagi yaylovlar hududida jismoniy va yuridik shaхslar tomonidan dorivor oʻsimliklarni, shu jumladan, kavrak oʻsimligini yigʻish, ekish va yetishtirish Qoʻmita bilan tuzilgan ijara shartnomalari asosida va unda belgilangan hududlarda amalga oshiriladi.
2022 yil 1 yanvardan boshlab quyidagilar uchun Davlat byudjeti hisobidan ajratiladigan subsidiya Qoʻmita tomonidan beriladi:
- qorakoʻlchilik хoʻjaliklariga ular tomonidan yetishtirilib, eksportga sotilgan har bir dona qorakoʻl va qorakoʻlcha terilari uchun;
- yetishtiriladigan pilla (hoʻl pilla) hosilining bir kilogrammi uchun.
2022 yilda yetishtiriladigan pilla (tirik pilla) хarid narхi 10%ga oshiriladi.
Hujjat 9.07.2021 yilda «Xalq soʻzi» gazetasida chop etilgan.
Elmira Siraziyeva.
