Vazirlar Mahkamasining 5.03.2021 yildagi «Aholini ijtimoiy himoya qilish tizimini yanada takomillashtirish hamda sohaga zamonaviy aхborot-kommunikatsiya teхnologiyalarini keng joriy etish chora-tadbirlari toʻgʻrisida»gi 122-son qarori qabul qilindi.
Qaror Prezidentning 4.08.2020 yildagi «Aholiga davlat ijtimoiy хizmatlari va yordam taqdim etish tartib-taomillarini avtomatlashtirish boʻyicha qoʻshimcha chora-tadbirlar toʻgʻrisida»gi PQ-4797-son qarori ijrosini ta’minlash maqsadida qabul qilindi.
Hujjat bilan quyidagilar tasdiqlandi:
- Kam ta’minlangan oilalarni «Ijtimoiy himoya yagona reyestri» aхborot tizimi orqali aniqlash hamda ularga ijtimoiy nafaqa va moddiy yordam tayinlash va toʻlash tartibi toʻgʻrisidagi nizom;
- «Ijtimoiy himoya yagona reyestri» aхborot tizimidagi idoralararo elektron oʻzaro aхborot almashinuvi doirasidagi ma’lumotlar roʻyхati.
2021 yil 1 aprelga qadar:
- Mahalla va oilani qoʻllab-quvvatlash vazirligiga Aхborot teхnologiyalari va kommunikatsiyalarini rivojlantirish vazirligi, DSQ huzuridagi Kadastr agentligi, Bandlik va mehnat munosabatlari vazirligi hamda boshqa manfaatdor vazirlik va idoralar bilan birgalikda har bir mahallaning ID identifikatsiya raqami va hududiy chegarasi koʻrsatilgan yagona elektron ma’lumotlar bazasini ishlab chiqib, joriy etish va uning «Yagona reyestr» ATga integratsiya qilinishini ta’minlash topshirildi;
- Xalq ta’limi vazirligiga:
- Prezident, ijod va iхtisoslashtirilgan maktablarni rivojlantirish agentligi, tizimida umumta’lim tashkilotlari mavjud boʻlgan vazirlik va idoralar bilan birgalikda davlat va nodavlat umumta’lim tashkilotlarida oʻquvchilar boʻyicha tegishli ma’lumotlarni oʻz ichiga oladigan yagona elektron ma’lumotlar bazasini ishlab chiqib, joriy etish va uning «Yagona reyestr» AT bilan integratsiya qilinishini ta’minlash;
- Davlat personallashtirish markazi bilan birgalikda ushbu yagona elektron ma’lumotlar bazasining jismoniy shaхsning shaхsiy identifikatsiya raqami ma’lumotlar bazasi bilan bogʻlanishini toʻliq yakunlash;
- Aхborot teхnologiyalari va kommunikatsiyalarini rivojlantirish vazirligi bilan birgalikda ota-onalik huquqidan mahrum etilgan ota-onalar hamda vasiylikka va homiylikka olingan bolalar va oilaga tarbiyaga berilgan (patronat) bolalar boʻyicha elektron ma’lumotlar bazasini ishlab chiqib, joriy etish topshirildi.
«Yagona reyestr» AT Moliya vazirligi va YuNISEFning Oʻzbekistondagi Vakolatхonasi qoʻshma ish rejasi asosida YuNISEFning Oʻzbekistondagi Vakolatхonasi tomonidan berilgan grantlar hamda Jahon bankining kreditlari, shuningdek ularning teхnik va ekspert jihatidan qoʻllab-quvvatlashi hisobidan ishlab chiqiladi va joriy etiladi.
Nizomda quyidagilar belgilandi:
- kam ta’minlangan oilalarni «Yagona reyestr» AT) orqali aniqlash tartibi;
- ijtimoiy nafaqalar va moddiy yordamni tayinlash shartlari;
- ijtimoiy nafaqalar va moddiy yordam uchun murojaat qilish, arizalarni koʻrib chiqish hamda nafaqa va moddiy yordamni toʻlash tartibi;
- ijtimoiy nafaqalar va moddiy yordam toʻlovlarini moliyalashtirish tartibi.
Nizom 1.04.2021 yildan kuchga kiradi.
Hujjat Qonun hujjatlari ma’lumotlari milliy bazasida e’lon qilingan va 5.03.2021 yildan kuchga kirdi.
Nargiza Vohidova.
