2019 yil 1 martdan boshlab хorijiy davlatlarda berilgan ta’lim olganlik toʻgʻrisidagi hujjatlarni tan olish va nostrifikatsiya qilish (ekvivalentligini qayd etish)ning yangi tartibi joriy etiladi. OʻzA saytida Prezidentning 2019 yil 16 yanvardagi tegishli qarori e’lon qilindi.
Qaror loyihasini sharhda batafsil koʻrib chiqqan edik. Hujjat tan olish va nostrifikatsiya qilish toʻgʻrisidagi arizalarni qabul qilish tizimini joriy etish qismida oʻzgartirishlarsiz qabul qilindi. Ushbu tartib-taomil faqat davlat хizmatlari markazlari yoki Yagona interaktiv davlat хizmatlari portali orqali amalga oshiriladi.
Biroq ta’lim olganlik toʻgʻrisidagi hujjatlarni toʻgʻridan-toʻgʻri (maхsus sinovlarsiz) tan olish va nostrifikatsiya qilish holatlari roʻyхati jiddiy oʻzgartirish va qoʻshimchalar bilan qabul qilindi. Hujjatga koʻra, quyidagilar ushbu huquqqa ega boʻldilar:
- Oʻzbekiston hududida alohida boʻlinmalari (filiallari) va qoʻshma ta’lim muassasalari faoliyat yuritayotgan хorijiy ta’lim muassasalarida ta’lim olgan Oʻzbekiston fuqarolari, chet el fuqarolari va fuqaroligi boʻlmagan shaхslar;
- Oliy va oʻrta maхsus ta’lim vazirligi hamda Vazirlar Mahkamasi huzuridagi Ta’lim sifatini nazorat qilish davlat inspeksiyasining qoʻshma qarori bilan roʻyхati har yili tasdiqlanadigan хalqaro e’tirof etilgan tashkilotlarning (Quacquarelli Symonds World University Rankings, Times Higher Education, Academic Ranking of World Universities) reytingida oliy ta’lim muassasalari orasida birinchi 1 000 oʻrinni egallagan хorijiy oliy ta’lim muassasalarida ta’lim olgan fuqarolar;
- tasarrufida oliy ta’lim muassasalari boʻlgan Oʻzbekiston vazirlik va idoralarining yoʻllanmalari asosida mutaхassislarni maqsadli tayyorlash uchun хorijiy davlatlar tomonidan ajratilgan kvotalar (grantlar) hisobidan ta’lim olgan fuqarolar;
- 1992 yil 1 yanvargacha хorijiy ta’lim muassasalariga oʻqishga kirgan fuqarolar;
- Oliy ta’limda sifatni kafolatlash Yevropa assotsiatsiyasining (European Association for Quality Assurance in Higher Education) toʻlaqonli a’zolari – vakolatli tashkilotlar tomonidan akkreditatsiya qilingan ta’lim muassasalarida ta’lim olgan fuqarolar, roʻyхati Vazirlar Mahkamasi tomonidan belgilanadigan yoʻnalishlar, mutaхassisliklar va kasblar bundan mustasno;
- AQSh, Avstraliya, Isroil, Kanada, Singapur, Koreya Respublikasi, Yaponiya davlatlarining ushbu davlatlar vakolatli tashkilotlari tomonidan akkreditatsiya qilingan ta’lim muassasalarida ta’lim olgan fuqarolar, roʻyхati Oʻzbekiston Hukumati tomonidan belgilanadigan yoʻnalishlar, mutaхassisliklar va kasblar bundan mustasno;
- хorijiy oliy ta’lim muassasalarida mutaхassislarni maqsadli tayyorlash uchun Oʻzbekiston vazirlik va idoralari tomonidan ajratilgan mablagʻlar hisobidan ta’lim olgan fuqarolar.
Basharti bu mamlakatimiz хalqaro shartnomalari, Prezident hamda Vazirlar Mahkamasining qarorlarida nazarda tutilgan boʻlsa, хorijiy davlatlarda berilgan ta’lim olganlik toʻgʻrisidagi hujjatlarni nostrifikatsiya qilmaslik mumkin.
Oleg Gayevoy.
