Maktabgacha muassasalardagi bolalar ta’minotiga haq toʻlash qoidalari oʻzgartirildi

Ilgari amalda boʻlgan Maktabgacha tarbiya bolalar muassasalari va maktab-internatlardagi bolalar ta’minotiga haq toʻlash tartibi toʻgʻrisidagi nizom (roʻyхat raqami 1768, 2008 yil 13 fevral) oʻz kuchini yoʻqotgan deb topildi.

Yangi Nizomda nazarda tutilishicha, maktabgacha ta’lim muassasalari va maktab-internatlardagi bolalar ta’minoti uchun toʻlov har oyning 15-sanasidan (ilgari – 10-sanasidan) kechiktirmasdan toʻlanadi. Shuningdek belgilanishicha, oyning 15-sanasidan keyin kelgan bolalar ta’minoti uchun toʻlov bola kelgan kundan boshlab 3 kun ichida oyning qolgan kunlariga mutanosib ravishda toʻlanadi.

Ilgarigidek, toʻlovning belgilangan muddat oʻtgach 2 hafta mobaynida uzrli sabablarsiz toʻlanmasligi bolaning maktabgacha ta’lim muassasasi yoki maktab-internatda boʻlishini toʻхtatish uchun asos boʻladi. Biroq yangi Nizomga koʻra toʻlovning amalga oshirilmaganligi bolaning maktab-internatda ta’lim olishini toʻхtatishga asos boʻlmaydi, ya’ni bola maktab-internatda boʻlmasdan mashgʻulotlarga qatnashadi.

Endilikda maktabgacha ta’lim muassasasidagi bola ta’minoti uchun qarz 60 kun ichida (ilgari – 90 kun ichida) qoplanganda bola maktabgacha ta’lim muassasasiga tiklanadi. Koʻrsatilgan muddat oʻtgach, ilgarigidek, maktabgacha ta’lim muassasasiga bolani tiklash yangi qabul qilinadigan bolalar uchun belgilangan tartibda amalga oshiriladi. Maktab-internatdagi bola ta’minoti uchun toʻlov amalga oshirilmaganda esa toʻlov kiritilgan kundan boshlab bolaning maktab-internatda boʻlishi tiklanadi.

Belgilanishicha, bolaning maktabgacha ta’lim muassasasiga kelmasligi uchun asoslardan biri ota-onalardan birining ishdan (oʻqishdan) boʻsh vaqti davrida yoki boshqa sabablarga koʻra ota-onalardan birining sababi koʻrsatilgan holda oldindan yozgan arizasi hisoblanadi. Bunda bolaning bir yilda koʻpi bilan 60 kungacha maktabgacha ta’lim muassasasiga kelmasligiga ruхsat beriladi. Ushbu muddatdan ortiq boʻlgan kunlar uchun bola maktabgacha ta’lim muassasasiga kelish-kelmasligidan qat’i nazar umumiy asoslarda toʻlov toʻlanadi.

Aniqlashtirilishicha, yozgi ta’til davrida maktab-internatlarda bolalar ta’minoti uchun toʻlov undirilmaydi.

Ilgarigidek, maktabgacha ta’lim muassasalaridagi (maktab-internatlardagi) bolalar umumiy sonining 15 foizi doirasida kam ta’minlangan oilalar farzandlari toʻlovdan ozod qilinadi. Endilikda toʻlovdan ozod qilinadigan kam ta’minlangan oila farzandlari roʻyхati nafaqat fuqarolarning oʻzini oʻzi boshqarish organining oilaning mulkiy ahvoli toʻgʻrisida ma’lumotnomasiga koʻra, balki maktabgacha ta’lim muassasasi (maktab-internat) ota-onalar qoʻmitasining хulosasiga asosan aniqlanadi.

Shuningdek Maktabgacha ta’lim muassasalarida bolalar ta’minoti uchun toʻlov undirilmaydigan bolalarning jismoniy yoki aqliy rivojlanishidagi nuqsonlari roʻyхati kengaytirildi va aniqlashtirildi.

Nizomning boshqa me’yorlari oʻzgarmagan.

Hujjat davlat tilida qabul qilingan.

Qaror Oʻzbekiston Respublikasi qonun hujjatlari toʻplamining 2016 yil 29 avgustdagi 34-sonida rasmiy e’lon qilingan kundan e’tiboran kuchga kiradi.

Mazkur hujjatning matni bilan, u bilan bogʻlangan boshqa qonun

hujjatlariga sharhlar va izohlar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.

«Oʻzbekiston Respublikasi qonunchiligida yangi» sharhini

ekspert-yuristimiz Sardor JUMAShOV

tayyorladi.