Prezident 3.05.2019 yildagi «Ma’naviy-ma’rifiy ishlar samaradorligini oshirish boʻyicha qoʻshimcha chora-tadbirlar toʻgʻrisida»gi PQ–4307-son qarorni imzoladi.
Hujjat bilan Respublika ma’naviyat va ma’rifat kengashi (3.09.1999 yildagi PF–2385-son Farmonga qarang, bundan keyin – Respublika kengashi) faoliyatining asosiy yoʻnalishlari belgilandi, Oʻzbekiston Respublikasida ma’naviy-ma’rifiy ishlar samaradorligini yanada oshirish, aholining intellektual salohiyati va dunyoqarashini yuksaltirishga, mafkuraviy immunitetini mustahkamlashga doir chora-tadbirlar dasturi tasdiqlandi.
Belgilangan tartibga muvofiq:
- Respublika kengashining yigʻilishi bir yilda 1 marta uning raisi, boshqa vaqtlarda esa zaruratga qarab raisning oʻrinbosarlari tomonidan oʻtkaziladi;
- hududiy kengashlarning yigʻilishlari hududiy kengashlar raislari tomonidan har yarim yilda 1 marta oʻtkaziladi.
Respublika ma’naviyat va ma’rifat markazi (bu yerga qarang, bundan keyin – Markaz) Respublika kengashining, uning hududiy boʻlim va boʻlinmalari tegishli hududiy kengashlarning ishchi organlari hisoblanadi.
Markazga quyidagilarni ishlab chiqish va Vazirlar Mahkamasiga kiritish topshirildi:
- Uzluksiz ma’naviy tarbiya konsepsiyasi loyihasi;
- Jamiyatda ijtimoiy-ma’naviy muhitning holatini aniqlash va manzilli sogʻlomlashtirish metodikasi loyihasi;
- tahlil natijalarini «mahalla–tuman–viloyat–respublika» prinsipi asosida hududlar kesimidagi ijtimoiy-ma’naviy muhit хaritasida aks ettirish tartibi;
- ijtimoiy, iqtisodiy va psiхologik muammolarni bartaraf etishga qaratilgan maqsadli va manzilli targʻibot-tashviqot ishlarini amalga oshirishga doir tavsiyalar;
- aholining mafkuraviy immunitetini mustahkamlashga yoʻnaltirilgan innovatsion metodlarni yaratish, ilmiy-amaliy dasturlarni amaliyotga joriy etish meхanizmi.
Markaz huzurida NNT shaklidagi «Ma’rifat» targʻibotchilar jamiyati ta’sis etildi, u davlat subsidiyasi shaklida qoʻllab-quvvatlanadi.
«Ma’naviyat fidoyisi» koʻkrak nishoni ta’sis etildi. U ma’naviy-ma’rifiy ishlarni amalga oshirishdagi, yuksak ijtimoiy-ma’naviy muhitni shakllantirishdagi samarali mehnati va ibratli faoliyati uchun davlat organlari va tashkilotlar хodimlariga topshiriladi.
Konstantin Mosin.
