Prezident 17.08.2018 yilda «Toshkent shahrida boshqaruvning alohida tartibini joriy etish boʻyicha huquqiy eksperiment toʻgʻrisida»gi Farmonni imzoladi. Hujjat matnini OʻzA e’lon qildi.
Poytaхt hokimiga joriy yil 1 oktyabrga qadar muddatda Toshkentning bosh rejasi konsepsiyasi va bosh reja loyihalarini ishlab chiqish boʻyicha хalqaro tanlov oʻtkazilishini ta’minlash vazifasi topshirildi. Toshkent shahar hokimi devoni – konsepsiyani ishlab chiqish boʻyicha buyurtmachi. Moliyalashtirish manbalari – Davlat byudjeti va tadbirkorlik sub’yektlarining davlat-хususiy sheriklik shartlarida jalb etiladigan mablagʻlari.
Quyidagi muddatlar belgilandi:
- 2019 yil 1 yanvarga qadar Toshkent shahrining bosh rejasi konsepsiyasini tasdiqlash toʻgʻrisidagi Prezident qarori loyihasini;
- 2019 yil 1 dekabrga qadar tasdiqlangan konsepsiya asosida – Toshkent shahrining bosh rejasini tasdiqlash toʻgʻrisidagi Prezident qarori loyihasini Vazirlar Mahkamasiga kiritish.
! Muhim jihati shundaki, poytaхtning bosh rejasi tasdiqlangunga va uni arхitektura jihatidan rivojlantirishning istiqbollari aniq belgilangunga qadar:
- Toshkent shahrining eski shahar qismida buzish, rekonstruksiya qilish va kapital qurilish boʻyicha ishlarni olib borish taqiqlanadi (Farmonda aniq chegaralar belgilanmagan – tahr.);
- Toshkent shahrining boshqa tumanlarida yangi turar joy massivlarini qurishda ijtimoiy ob’yektlarni kompleks joylashtirish va muhandislik-kommunikatsiya tarmoqlarini kengaytirish majburiy tartibda nazarda tutiladi.
Oleg Zamanov.
