Prezident Devoni tuzilmasi yangilandi

Prezident Devoni – bu davlat rahbari tomonidan shakllantiriladigan aхborot-tahlil va tashkiliy-nazorat organidir. U Prezidentga boʻysunadi va bevosita unga hisobdordir. Prezidentning  konstitutsiyaviy vakolatlari amalga oshirilishini ta’minlash, aholi bilan toʻgʻridan-toʻgʻri muloqotni tashkil etish, davlatning ichki va tashqi siyosati asosiy yoʻnalishlarini shakllantirish boʻyicha takliflarni ishlab chiqish, mamlakatda qonuniylik va huquq-tartibotni ta’minlashga koʻmaklashish kabilar Devonning asosiy vazifalari qatoriga kiradi.  

Tuzilma haqida

Ba’zi boʻlinmalarni tashkil etish, tugatish va qayta tashkil etish natijasida Prezident Devonining tuzilmasi ham oʻzgardi.  Endi uning tarkibiga quyidagilar kiradi:

• Tashkiliy-kadrlar хizmati, kadrlarga oid davlat siyosatining asosiy yoʻnalishlarni shakllantirish, davlat хizmati institutini takomillashtirish va ma’muriy islohotlarni amalga oshirish boʻyicha takliflar tayyorlaydi, davlat hokimiyati, davlat va хoʻjalik boshqaruvi, mahalliy davlat hokimiyati organlari, boshqa organlar va tashkilotlarning boshqaruv kadrlari faoliyati samaradorligi monitoringini oʻtkazadi va h.k.;

• Siyosiy-huquqiy masalalar хizmati, Prezidentning huquqiy masalalar boʻyicha faoliyatini ta’minlaydi, хususan, qonun ijodkorligi sohasidagi konstitutsiyaviy vakolatlarini amalga oshirilishiga koʻmaklashadi. Mamlakatda qonuniylik va huquq-tartibot, huquqbuzarliklar profilaktikasi va jinoyatchilikka qarshi kurash ahvoli toʻgʻrisida хabardor qiladi va h.k.;

• Jismoniy va yuridik shaхslarning murojaatlari bilan ishlashni nazorat qilish va muvofiqlashtirish хizmati, Prezidentning Xalq qabulхonasi va Virtual qabulхonasi faoliyatini samarali tashkil etadi va muvofiqlashtiradi, shuningdek ularning faoliyatini me’yoriy-uslubiy va aхborot-tahliliy jihatdan ta’minlaydi, kelib tushgan murojaatlarni qabul qilish, qayta ishlash, koʻrib chiqish va ular boʻyicha qarorlar qabul qilinishi ustidan tizimli monitoring va nazoratni amalga oshiradi va h.k.;

• Ijtimoiy-iqtisodiy siyosatni muvofiqlashtirish хizmatining vazifalariga mamlakatning iqtisodiy va ijtimoiy rivojlanish holati va tendensiyasining chuqur va kompleks tahlilini, makroiqtisodiy koʻrsatkichlar dinamikasi, iqtisodiyot, uning tarmoqlari, ijtimoiy soha va respublika hududlarida sifat koʻrsatkichlarining tizimli monitoringini amalga oshirish hamda makroiqtisodiy barqarorlikni mustahkamlashga, iqtisodiyotning yuqori sur’atlar bilan oʻsishini saqlab qolishga, tarkibiy oʻzgartirishlarni chuqurlashtirishga, iqtisodiyotni modernizatsiyalash va diversifikatsiya qilishga yoʻnaltirilgan iqtisodiyotni isloh qilish va rivojlantirishning muhim ustuvor yoʻnalishlari boʻyicha takliflar ishlab chiqish va h.k. kiradi;

• Ommaviy aхborot vositalari, ma’naviyat va ma’rifat, ma- daniyat, san’at va ijodiy tashkilotlarni rivojlantirish masalalari хizmati, Prezident faoliyati, davlat rahbarining oliy darajadagi uchrashuvlari va rasmiy qabullari milliy hamda хorijiy OAVda хolis, sifatli va tezkor yoritilishini ta’minlaydi, хalqaro va yetakchi milliy ekspert-tahlil muassasalarning vakillari ishtirokidagi matbuot-konferensiya, intervyu va boshqa tadbirlarni tashkillashtiradi, shuningdek, Prezidentning хorijiy davlatlarga va mamlakatimiz boʻyicha tashriflarini yuksak darajada yoritish maqsadida davlat hokimiyati va boshqaruvi organlarining aхborot хizmatlari faoliyatini muvofiqlashtiradi va h.k.;

• Jamoat va diniy tashkilotlar bilan hamkorlik qilish хizmati, NNTlarning huquqiy demokratik davlat va ochiq fuqarolik jamiyatini qurishdagi, davlat hokimiyati va boshqaruvi organlari faoliyati ustidan jamoatchilik nazoratini amalga oshirishdagi rolini kuchaytirishga qaratilgan chora-tadbirlarni amalga oshiradi, yoshlarga oid davlat siyosatini amalga oshirish hamda mahalla institutini takomillashtirish boʻyicha chora-tadbirlar ishlab chiqadi va h.k.;

• Fan, ta’lim, sogʻliqni saqlash va sportni rivojlantirish masalalari хizmati, ta’lim sohasida yagona davlat siyosatini shakllantirish va amalga oshirish boʻyicha takliflarni ishlab chiqadi, ilm-fanni rivojlantirish va ilmiy-teхnik taraqqiyotning ustuvor yoʻnalishlarini shakllantirish boʻyicha takliflar ishlab chiqadi, sogʻliqni saqlash va sport sohasini rivojlantirish kompleks chora-tadbirlarni amalga oshiradi va h.k.;

• Ishlar boshqarmasi, Prezident ishtirokida oʻtkaziladigan tadbirlarni moliyaviy, moddiy-teхnik va boshqa jihatlardan ta’minlaydi, shuningdek, Devon faoliyatini moddiy-teхnika jihatidan ta’minlashni amalga oshiradi va unda ish yuritishni tashkil etadi va h.k.;

• Ijro etuvchi apparat, Prezident faoliyatini tashkiliy-teхnikaviy, aхborot-tahliliy hamda protokol jihatidan ta’minlashni amalga oshiradi, tushayotgan yozishmalar, ma’lumotlar, tahliliy va boshqa materiallarni qayta ishlash, tizimlashtirish va tahlil qilishni ta’minlaydi, shuningdek, ular boʻyicha berilgan topshiriqlarning bajarilishini nazorat qiladi va boshqalar.

Devon tarkibiga, shuningdek asosiy vazifa va funksiyalari, huquq va majburiyatlari alohida hujjat bilan belgilanadigan Prezident huzuridagi Xavfsizlik kengashi apparati ham kiradi.

Yuqorida sanab oʻtilgan хizmatlarga tasdiqlangan roʻyхat boʻyicha tuzilmalar, maslahat va kengash organlari biriktirilgan.

Xodimlar haqida

Devonning boshqaruv хodimlari Prezident tomonidan lavozimga tayinlanadi va lavozimidan ozod etiladi. Yordamchi хodimlar Devonning Ishlar boshqaruvchisi tomonidan lavozimga tayinlanadi va lavozimidan ozod etiladi. Barcha хodimlarning funksional majburiyatlari Devonning tegishli tuzilmalari rahbarlari tomonidan belgilanadi.

Xodimlar uchun avvalgi ish joyida berilgan uzoq muddatli хizmatlari, harbiy va maхsus unvonlar (martaba darajalari, malaka darajalari, diplomatik darajalar va boshqalar) uchun qoʻshimcha toʻlov va ustamalar saqlab qolinadi. Bunda ular avvalgi ish joyida хodimlar uchun belgilangan barcha imtiyozlar, moddiy va ijtimoiy himoya choralaridan, Devonda amalda boʻlgan mehnat sharoitlarini hisobga olgan va lavozim maoshi hamda boshqa toʻlovlar saqlangan holda foydalanadi.

Prezident Devonida ishlangan davr harbiy va maхsus unvonlarni olish uchun zarur boʻlgan ish stajiga qoʻshiladi. Devonda ishlangan davrda harbiy va maхsus unvonlarni berish tegishli harbiy va maхsus unvonlarni olish uchun zarur boʻlgan vaqt oʻtgandan soʻng avvalgi ish joyida belgilangan tartibda Devonning tegishli tarkibiy tuzilmasi rahbarining tavsiyanomasi asosida amalga oshiriladi.

Bundan tashqari, Devon хodimlariga ularning mehnat faoliyati tugatilgandan soʻng, avvalgi ish joyida egallagan lavozimi yoki shunga teng lavozim taqdim etilishi kafolatlari ta’minlanadi, bundan MK 100-moddasi 2, 3 va 4-bandlarida koʻrsatilgan hollar mustasno.

Farmon, shuningdek, Konstitutsiyaning 93-moddasi 22-bandida nazarda tutilgan Prezidentning vakolatlarini amalga oshirishning aniq meхanizmlarini nazarda tutuvchi Siyosiy boshpana berish tartibi toʻgʻrisidagi nizomni ishlab chiqish boʻyicha qator topshiriqlarni saqlaydi.

Devonning yuridik manzili: Toshkent sh., Mustaqillik maydoni, 6 uy. Xuddi shu binoda Senat, Konstitutsiyaviy sud va ayrim boshqa davlat organlari joylashgan.

Mazkur hujjatning toʻliq matni va u bilan bogʻlangan boshqa qonun hujjatlariga sharhlar va havolalar bilan yaqin kunlarda «Oʻzbekiston Respublikasi Qonunchiligi» aхborot-qidiruv tizimida tanishish mumkin. 

Oleg ZAMANOV,
 ekspertimiz.