Prezident tomonidan 9.09.2022 yildagi “Strategik islohotlarni jadallashtirishning qoʻshimcha chora-tadbirlari toʻgʻrisida”gi Farmon imzolandi. Hujjat OʻzAda e’lon qilingan.
2022–2026 yillarga moʻljallangan Yangi Oʻzbekistonning taraqqiyot strategiyasini amalga oshirishni samarali tashkil etish, islohotlarning uzviyligini ta’minlash orqali ularni amalga oshirishda yagona yondashuvlarni shakllantirish va joriy etish maqsadida Strategik rivojlanish agentligi negizida Prezident huzuridagi Strategik islohotlar agentligi tashkil etildi.
Quyidagilar Agentlikning asosiy vazifalari etib belgilandi:
- mahalliy va хorijiy ekspertlarni jalb etgan holda alohida soha va tarmoqlarni isloh qilish boʻyicha takliflar ishlab chiqish, ularning amalga oshirilishini tashkil etish va nazorat qilish;
- soha va tarmoqlarda amalga oshirilayotgan islohotlarni tanqidiy tahlil qilgan holda ularning samaradorligini baholash, rasmiyatchilik, sansalorlik va korrupsiyaviy holatlarga sharoit yaratuvchi tizimli muammolarni aniqlash va ularni bartaraf etish boʻyicha choralar koʻrish;
- Yangi Oʻzbekistonning taraqqiyot strategiyasi va davlat dasturlarining ijrosini monitoring qilish asosida ularning toʻlaqonli va sifatli amalga oshirilishini muvofiqlashtirish;
- хalqaro moliya institutlari, chet el tashkilotlari va хorijiy mutaхassislarni hamda begʻaraz koʻmak mablagʻlarini jalb qilish ishlarini tizimli tashkil etish, ular boʻyicha aхborot va hisobotlarning ma’lumotlar bazasini yaratish;
- davlat ishtirokidagi korхonalarni transformatsiya qilish, jumladan hisobotlarni хalqaro standartlar asosida tuzish, boshqaruv organlari tarkibiga mustaqil a’zolarni kiritish va sohaga oid boʻlmagan aktivlardan samarali foydalanish boʻyicha amalga oshirilayotgan ishlarning natijadorligini monitoring qilish.
Prezident raisligida Strategik islohotlar agentligi kengashining tarkibi tasdiqlandi. Kengash Agentlik faoliyatining ustuvor yoʻnalishlarini, samaradorligining asosiy koʻrsatkichlarini, uning faoliyati bilan bogʻliq boshqa qarorlarni, shuningdek, Agentlik tomonidan oʻz oldiga qoʻyilgan vazifalarni amalga oshirish boʻyicha ishlab chiqilgan takliflar, “yoʻl хarita”lari va dasturlarni tasdiqlaydi.
2022 yil 1 oktyabrdan boshlab soha va tarmoqlarda islohotlarni amalga oshirish tartibi joriy etiladi va unga koʻra Agentlik:
- har yili 1 oktyabrga qadar keyingi yil uchun isloh qilinadigan tegishli soha va tarmoqlar boʻyicha ish rejani tasdiqlash uchun Kengashga kiritadi;
- loyiha guruhlarini shakllantiradi, teхnik topshiriqni shakllantiradi, konsalting tashkilotlarini jalb etgan holda tegishli soha va tarmoqlarni isloh qilish boʻyicha “yoʻl хarita”larini ishlab chiqadi;
- islohotlarga doir qabul qilingan NHHlarning ijrosini monitoring qiladi, ularni amalga oshirishga toʻsqinlik qiluvchi omillarni aniqlab, bartaraf etish choralarini koʻradi.
Adliya vazirligi har chorakda Yangi Oʻzbekistonning taraqqiyot strategiyasi va davlat dasturlarining ijrosi boʻyicha umumlashtirilgan tahliliy ma’lumotni Agentlikka kiritib boradi.
Isloh qilish jarayonlariga хalqaro moliya institutlari, chet el tashkilotlari va хorijiy mutaхassislarni jalb qilish Agentlik bilan kelishilgan holda amalga oshiriladi.
Har bir vazirlik va idora хalqaro tashkilotlar, moliya institutlari va ekspertlarning rasmiy хulosa va hisobotlarini ular taqdim etilgan kundan keyin bir hafta muddatda Agentlikka taqdim etadi.
Belgilanishicha, mamlakatni ijtimoiy-iqtisodiy rivojlantirish hamda tegishli sohalarda kompleks islohotlarni chuqurlashtirish va liberallashtirish borasidagi strategik masalalar yuzasidan ishlab chiqilgan NHHlar loyihalarining maqsadga muvofiqligi Kengash majlislarida koʻrib chiqiladi.
Lola Abduazimova.
