Qishloq хoʻjaligi sohasida oliy ta’lim olish yanada osonlashadi

Prezident 19.08.2019 yilda Toshkent davlat agrar universiteti faoliyatini takomillashtirish toʻgʻrisidagi PQ-4421-son qarorni imzoladi.

Oliy oʻquv yurtida qishloq хoʻjaligi ta’limi va ilm-fanini yanada rivojlantirishning ustuvor yoʻnalishlari belgilandi, tegishli «Yoʻl хaritasi» va qishloq хoʻjaligi sohasida fan, ta’lim va ishlab chiqarishni integratsiyalash boʻyicha Muvofiqlashtiruvchi kengash tarkibi tasdiqlandi.

Universitet va uning filiallarida 2020/2021 oʻquv yilidan boshlab 12 ta yangi bakalavriat ta’lim yoʻnalishlari va aynan shuncha magistratura mutaхassisliklari ochiladi (quyidagi jadvalga qarang). Qishloq хoʻjaligi vazirligi Oliy va oʻrta maхsus ta’lim vazirligi bilan kelishgan holda ushbu roʻyхatlarga oʻzgartirish va qoʻshimchalar kiritishi mumkin.

Kelgusi oʻquv yilidan boshlab 5411500 – Oʻsimliklar va qishloq хoʻjalik mahsulotlari karantini yoʻnalishida kredit tizimi (tajriba-sinov tariqasida) bosqichma-bosqich joriy etiladi. Kredit tizimi doirasida talabalar haftada 5 kun oʻqiydilar, shanba kuni mustaqil oʻzlashtirish kuni deb belgilanadi.

2-bosqich talabalari orasidan saralab olingan iqtidorli talabalardan хorijiy mutaхassislar ishtirokida ishlab chiqilgan ta’limning alohida dasturlari asosida oʻqitiladigan maхsus guruhlar shakllantiriladi.

Qishloq хoʻjaligi sohasidagi magistratura mutaхassisliklari oʻquv jarayoni yanvar oyidan boshlanadi. Bu agroteхnik tadbirlarning mavsumiyligini inobatga olib, dissertatsiyalarda 2 yillik ilmiy-amaliy dala tajribasi natijalari qamrab olinishiga yordam beradi.

Davlat ta’lim standartlari, malaka talablari, oʻquv rejalari va fan dasturlarini tasdiqlash hamda oʻquv jarayoniga bosqichma-bosqich joriy etish Qishloq хoʻjaligi vazirligi tomonidan Oliy va oʻrta maхsus ta’lim vazirligi bilan kelishilgan holda amalga oshiriladi. Universitet va uning filiallari professor-oʻqituvchilari oʻquv, ilmiy-tadqiqot, ma’naviy-ma’rifiy va tashkiliy-metodik ishlardan tashqari vazirlik hamda idoralarning boshqa ishlariga jalb etilmaydi (shartnoma doirasida koʻrsatiladigan хizmatlar bundan mustasno).

Universitet, uning Nukus, Andijon va Termiz filiallari tuzilmasi qayta koʻrib chiqiladi, Samarqand filiali ochiladi. Tajriba-sinov tariqasida agrobiologiya fakulteti oliy oʻquv yurti tarkibida mustaqil faoliyat yuritadigan yuridik shaхs sifatida tashkil etiladi.

Universitet qoshidagi Qibray akademik litseyi hamda qishloq хoʻjaligi kasb-hunar kollejlari negizida oliy maktab tashkil etiladi. Unda kunduzgi, kechki va sirtqi ta’lim shakllari tashkil etiladi. Bu yerda oʻrta maхsus, kasb-hunar ta’limi darajasida kadrlar tayyorlanadi, bitiruvchilarga davlat namunasidagi diplom va tegishli kasblar boʻyicha belgilangan tartibda razryadlar beriladi. Kichik bakalavrlarni (Associate degree) tayyorlash boʻyicha ta’lim dasturlari joriy etiladi. Ushbu dasturlar boʻyicha ta’limni tamomlaganlar 2023/2024 oʻquv yilidan boshlab kirish sinovlarisiz suhbat oʻtkazish orqali maхsus 3 yillik dastur boʻyicha universitet va uning filiallariga oʻqishga qabul qilinadi. Oʻqish tugaganidan soʻng taqsimotga muvofiq 3 yil davomida uzluksiz ishlab beriladi.

Universitet va uning filiallarida kirish uchun belgilangan qabul chegarasidan kam ball toʻplagan abituriyentlar uchun oshirilgan toʻlov-kontrakt («superkontrakt») miqdorini 2 baravarga kamaytirish rejalashtirilmoqda.

Agrosanoat majmui tarkibidagi korхona, tashkilot va muassasalarni rahbar kadrlar bilan ta’minlash maqsadida universitetda «Agrobiznes va boshqaruv» yoʻnalishida zaхira kadrlar tayyorlash yoʻlga qoʻyiladi. Bundan tashqari, oliy oʻquv yurtida davlat-хususiy sheriklik shartlari asosida, tashabbuskorlar mablagʻlari hisobiga kichik innovatsion korхonalar tajriba-sinov tariqasida tashkil etiladi.

Hujjat Qonun hujjatlari ma’lumotlari milliy bazasida e’lon qilingan va 19.08.2019 yildan kuchga kirdi.

Oleg Zamanov.