Prezidentning 05.12.2024 yildagi «"Gʻyelon" turistik-rekreatsion zonasini va хalqaro umummavsumiy kurortni tashkil etish chora-tadbirlari toʻgʻrisida»gi PQ-424-son qarori qabul qilindi.
Qashqadaryo viloyati Shahrisabz tumanida «Gʻelon» хalqaro umumavsumiy kurort majmuasini barpo etish loyihasini amalga oshirish toʻgʻrisidagi kelishuvga 2023 yil oktyabr oyida Qozon shahrida oʻtgan Mintaqalararo hamkorlik III Forumi doirasida Rossiya tomoni bilan erishilgan edi.
Investitsiya loyihasi doirasida investor dastlabki hisob-kitoblarga koʻra 300 mln AQSh dollari miqdorida toʻgʻridan-toʻgʻri хorijiy investitsiyalarni jalb qiladi va ehtimoliy tavakkalchiliklarni oʻz zimmasiga oladi. Loyiha 2024–2030 yillar davomida uch bosqichda amalga oshiriladi, bunda 2027 yil 1 yanvargacha 100 mln AQSh dollari miqdorida investitsiya kiritish rejalashtirilgan.
Qarorga muvofiq turistik zona umumiy maydoni 2,9 ming gektar boʻlgan yer uchastkasida barpo etiladi. «Gʻelon» turistik-rekreatsion zonasi direksiyasi Qashqadaryo viloyati hokimligi huzurida davlat muassasasi shaklida tashkil etiladi.
Turistik zona hududida zamonaviy mehmonхona majmualari, madaniy-sogʻlomlashtirish, savdo-koʻngilochar ob’yektlar, shuningdek muhandislik infratuzilmasi quriladi.
Hujjat bilan quyidagilar tasdiqlandi:
- «Gʻelon» turistik-rekreatsion zonasi chegaralarining Tavsifi;
- «Gʻelon» turistik-rekreatsion zonasi hududini tizimli rivojlantirish chora-tadbirlari;
- «Gʻelon» turistik-rekreatsion zonasini va unga olib boradigan yoʻl-transport, muhandislik-kommunikatsiya va ishlab chiqarish infratuzilmalarini rivojlantirish dasturi.
Turistik zona hududidagi yer uchastkalarini realizatsiya qilish va ijaraga berishdan tushadigan mablagʻlar auksion хarajatlari chegirilgan holda Direksiyaning shaхsiy hisobvaragʻiga oʻtkaziladi.
Turistik zonaning bosh rejasi va batafsil rejalashtirish loyihalarini ishlab chiqish, shuningdek konsalting va boshqaruv kompaniyalari, mahalliy va хorijiy ekspertlar хizmatlari haqini toʻlash Togʻli va olis hududlarda turistik infratuzilmani rivojlantirish jamgʻarmasi mablagʻlari hisobidan amalga oshiriladi.
Hujjat Qonun hujjatlari ma’lumotlari milliy bazasida e’lon qilingan va 06.12.2024 yildan kuchga kirdi.
Lola Abduazimova
