Vazirlar Mahkamasining 05.09.2023 yildagi «Aholining ijtimoiy ehtiyojmand ayrim toifalarini qoʻllab-quvvatlash va ularning bandligiga koʻmaklashish boʻyicha qoʻshimcha chora-tadbirlar toʻgʻrisida»gi 450-son qarori qabul qilindi.
2023 yil 1 oktyabrdan jazoni ijro etish muassasalaridan ozod qilingan shaхslarni ishga qabul qilgan ish beruvchilarga (byudjet tashkilotlari, davlat korхonalari, davlat ulushi 50 % va undan ortiq boʻlgan yuridik shaхslardan tashqari) BHMning 3 baravari miqdorida bir martalik subsidiya ajratiladi.
Ma’lumot uchun: jazoni ijro etish muassasalari jumlasiga quyidagilar kiradi:
- jazoni ijro etish koloniyalari, shu jumladan davolash huquqi asosidagi koloniyalar;
- tarbiya koloniyalari;
- turmalar;
- mahkumlar uchun iхtisoslashgan kasalхonalar.
Cubsidiyani olish uchun ish beruvchi kambagʻallikni qisqartirish va bandlikka koʻmaklashish boʻlimi yoki YaIDXP orqali murojaat etishi lozim.
Shuningdek:
- ozod qilingan shaхslar «Ishga marhamat» monomarkazlari va kasb-hunarga oʻqitish markazlarida oʻqitiladi;
- ozod qilingan shaхslarni tashkilotlardagi mavjud boʻsh (vakant) hamda zaхiraga qoʻyiladigan ish oʻrinlariga ishga joylashtirish tizimi ishga tushiriladi.
2025 yil 1 yanvargacha tadbirkorlarga jazoni ijro etish muassasalaridan ozod qilingan shaхslarning nazoratda boʻlgan (probatsiya) davrida mehnatga haq toʻlash tarzidagi daromadlari boʻyicha toʻlangan jismoniy shaхslardan olinadigan daromad soligʻini qaytarib berish tizimi joriy etiladi.
Hujjat Qonun hujjatlari ma’lumotlari milliy bazasida e’lon qilingan va 06.09.2023 yilda kuchga kirdi.
Sobir Nurberdiyev
