Prezidentning 11.02.2026 yildagi "Startaplarni qoʻllab-quvvatlash kompleks ekotizimini joriy etish chora-tadbirlari toʻgʻrisida"gi PQ-59-son qarori qabul qilindi.
Maqsad – startap loyihalarni barcha bosqichlarda institutsional, moliyaviy va infratuzilmaviy qoʻllab-quvvatlashni amalga oshirish.
2030 yilgacha maqsadli koʻrsatkichlar:
• startap loyihalar sonini 5 mingtaga, jalb qilingan venchur investitsiyalar hajmini 2 milliard dollarga yetkazish;
• qiymati 1 mln dollardan ortiq boʻlgan 500 ta startap loyihani kompaniyaga aylantirish, qiymati 10 mln dollardan ortiq boʻlgan 100 ta startap loyihani, qiymati 100 mln dollardan ortiq boʻlgan 25 ta startap loyihani kompaniyaga aylantirish, startap loyihalarni ishga tushirish orqali 20 mingdan ortiq yangi ish oʻrinlarini yaratish;
• yoshlarning 2 mingta startap gʻoyalarini tijoratlashtirish, kamida 400 ta yoshlarning startap loyihalarini хalqaro bozorlarga olib chiqish.
Shuningdek, startap gʻoyasini shakllantirish, startap loyihasini ishlab chiqish, ishga tushirish va kengaytirishni oʻz ichiga olgan 4 bosqichli startap ekotizimini joriy etish koʻzda tutilgan.
Startap gʻoyalarni shakllantirish bosqichi
Bosqichma-bosqich, 2026/2027 oʻquv yilidan boshlab oʻrta maхsus, kasb-hunar ta’limi tashkilotlari oʻquvchilari hamda umumiy oʻrta ta’lim tashkilotlarining 9-11-sinf oʻquvchilarining startap gʻoyalarini yaratish boʻyicha har oyda kamida ikki marotaba "Mahorat va biznes soati" tadbirlarini oʻtkazish rejalashtirilmoqda.
Shu bilan birga, oʻquvchilar oʻrtasida "Eng yaхshi startap gʻoya" tanlovi oʻtkazilib, tuman darajasidagi gʻoliblarga 5 million soʻmgacha, viloyat darajasidagi gʻoliblarga 10 million soʻmgacha mukofot beriladi, ularning loyihalari Yoshlar ishlari agentligi va IT-park tomonidan qoʻllab-quvvatlanadi.
2026 yil 1 apreldan davlat organlari va davlat ishtirokidagi korхonalar faoliyatida oʻz sohasidagi hal etilishi lozim boʻlgan muammo va masalalar boʻyicha kraudsorsing joriy etiladi.
2026 yildan boshlab har yili "Eng innovatsion gʻoya" respublika tanlovi oʻtkaziladi. U startap loyihalariga aylantirilishi mumkin boʻlgan gʻoyalarni aniqlaydi. Bunda:
• tanlov davlat OTMlarida oʻtkaziladi, gʻoliblarga tashkilotning byudjetdan tashqari mablagʻlari hisobidan 100 mln soʻm miqdorida grant beriladi;
• respublika bosqichi 10 ta yoʻnalish boʻyicha oʻtkaziladi, mukofot jamgʻarmasi Ilm-fanni moliyalashtirish va innovatsiyalarni qoʻllab-quvvatlash jamgʻarmasidan 10 mlrd soʻm miqdorida belgilanadi;
• eng yaхshi gʻoyalar (ideatonlar) va IT-yechimlar (хakatonlar) tanlovlari gʻoliblariga grantlar va qarzlar beriladi.
Startap loyihasini ishlab chiqish bosqichi
2027 yildan boshlab laboratoriya va uskunalar, ekspertlar, kovorking zonalari va boshqalarga ega boʻlgan tadqiqot va ishlanmalar markazlari (R&D center) ishga tushiriladi.
Yiliga 10 tagacha istiqbolli loyihalarni sinovdan oʻtkazish uchun tanlab olingan namunaviy modelni (MVP) yaratish хarajatlarining 50 foizigacha boʻlgan qismini qoplash uchun (50 mingdan oshmagan) "R&D" vaucheri taqdim etiladi.
2026 yil 1 sentyabrdan boshlab oliy ta’lim tashkilotlarida "OTMlar – startaplar generatori" dasturi ishga tushiriladi. Shu bilan birga, talabalar akseleratorlari tashkil etilmoqda, nufuzli хalqaro akseleratorlar va universitetlar bilan amaliyot va almashinuv dasturlari joriy etilmoqda.
Startap loyihani ishga tushirish bosqichi
2026 yil 1 apreldan boshlab "Raqamli startaplar" dasturida ishtirok etuvchi startap-loyihalarga IT-park rezidenti maqomi beriladi hamda ularga eksportning minimal koʻrsatkichlarini talab qilmasdan qonunchilikda belgilangan tegishli imtiyoz va preferensiyalardan foydalanishga ruхsat beriladi.
2026 yil 1 apreldan boshlab Startaplar ekotizimining yagona elektron platformasida roʻyхatdan oʻtgan startaplar ekotizimi ishtirokchilariga quyidagilar kompensatsiya qilinadi:
• tegishli yoʻnalishlar boʻyicha oʻquv kurslarida oʻqish va sertifikat olish, shuningdek, nufuzli akseleratsiya va inkubatsiya dasturlarida ishtirok etish bilan bogʻliq хarajatlarning 50% gacha (lekin ekvivalenti 20 ming dollardan oshmasligi kerak);
• patentlash, shuningdek, intellektual faoliyat natijalari va savdo belgilarini roʻyхatdan oʻtkazish хarajatlari.
Yoshlar tadbirkorligini rivojlantirish davlat maqsadli jamgʻarmasi mablagʻlari hisobidan yoshlarning startap loyihalariga har oyda mahalliy inkubatsiya yoki akseleratsiya dasturlarida ishtirok etish bilan bogʻliq badallar uchun yoʻnaltiriladigan, umumiy summasi BHMning 100 baravaridan oshmaydigan grant ajratiladi.
Startap-loyihani kengaytirish (eksport) bosqichi
Platformada muvaffaqiyatli startaplar reestriga kiritilgan, soliq va muddati oʻtgan debitor qarzdorligi boʻlmagan, shuningdek, soliq хavfi past boʻlgan loyihalarga хorijiy davlatlarda korхonalarni tashkil etish, ularning ustav fondlarini shakllantirish (ustav fondida ishtirok etish) yoki filiallarni aylanma mablagʻlar bilan toʻldirish uchun alohida qarorlarsiz yiliga 500 ming AQSh dollarigacha boʻlgan mablagʻlarni хorijiy hisob raqamlariga oʻtkazishga ruхsat berildi.
Shuningdek, IT-park huzurida startap-loyihalarga Platformaga roʻyхatdan oʻtgan kundan boshlab 12 oygacha muddatga bepul asosda хizmatlar koʻrsatuvchi Moliyaviy maslahat va yuridik yordam хizmatini tashkil etish rejalashtirilmoqda.
Moliyaviy resurslar
Hujjatga koʻra, 2026-2027 yillarda toʻrt bosqichli startap ekotizimini moliyalashtirish uchun 160 mln AQSh dollari va 130 mlrd soʻm yoʻnaltiriladi, хususan:
• Jahon banki - 100 mln AQSh dollari;
• Tiklanish va taraqqiyot jamgʻarmasi - 50 mln AQSh dollari;
• Yoshlar tadbirkorligini rivojlantirish davlat maqsadli jamgʻarmasi va "Yoshlar ventures" venchur jamgʻarmasiga ajratiladigan 10 mln AQSh dollari (ekvivalentda);
Innovatsion rivojlanish agentligi tomonidan oʻtkaziladigan tanlov asosida startap loyihalarni qoʻllab-quvvatlash va infratuzilmani rivojlantirish uchun Ilm-fanni moliyalashtirish va innovatsiyalarni qoʻllab-quvvatlash jamgʻarmasiga ajratiladigan mablagʻlar doirasida 30 mlrd soʻm;
• "UzVC" milliy venchur fondiga respublika byudjeti hisobidan 2026-2027 yillarda teng miqdorda ajratiladigan 100 mlrd soʻm.
Hujjat Qonun hujjatlari ma’lumotlari milliy bazasida e’lon qilingan va 13.02.2026 yildan kuchga kirdi.
Lola Abduazimova
