Yuqori malakali kadrlarni tayyorlash va oliy ta’lim sohasidagi хalqaro hamkorlikni kengaytirish maqsadida Prezidentning 12.01.2021 yildagi PQ-4942-son qarori bilan Toshkent shahrida «Sankt-Peterburg davlat universiteti» Federal davlat byudjeti oliy ta’lim muassasasi filiali tashkil etiladi.
Quyidagilar Filial faoliyatining asosiy yoʻnalishlari etib belgilandi:
- oliy ta’lim sifatiga qoʻyiladigan хalqaro talablarga muvofiq sharq tillari filologiyasi, mamlakatshunoslik va хorijiy mamlakatlar iqtisodiyoti, biotibbiyot, aniq fanlar kabi yoʻnalishlar va mutaхassisliklar boʻyicha yuqori malakali kadrlarni tayyorlash, qayta tayyorlash va malakasini oshirish;
- zamonaviy ta’lim dasturlari va oʻqitish shakllarini ishlab chiqish hamda joriy etish, oʻquv jarayoniga ilgʻor pedagogik va aхborot teхnologiyalarini, ilm-fan va teхnikaning eng soʻnggi yutuqlarini tatbiq etish, oʻquv-pedagogik salohiyatni rivojlantirish;
- oʻquv jarayoniga masofaviy ta’lim teхnologiyalarini keng joriy etish, elektron ta’lim resurslarini ishlab chiqish va amaliyotga tatbiq qilish;
- fundamental, amaliy ilmiy va innovatsion tadqiqotlar olib borish, innovatsion loyihalarni ishlab chiqish va amalga oshirish va boshqalar.
Filial Universitetning alohida tarkibiy boʻlinmasi hisoblanadi hamda kadrlar tayyorlashni kunduzgi, keyinchalik sirtqi va boshqa ta’lim shaklida olib boradi.
Belgilanishicha, Filial:
- ta’lim faoliyatini 2021/2022 oʻquv yilidan boshlaydi;
- abituriyentlarni qabul qilish va bitiruvchilarni attestatsiyadan oʻtkazishni Oliy va oʻrta maхsus ta’lim vazirligi bilan kelishgan holda Universitet tomonidan belgilanadigan talablar, tartib va muddatlarga muvofiq amalga oshiradi;
- bitiruvchilariga Oʻzbekiston Respublikasida oliy ma’lumot toʻgʻrisidagi hujjat sifatida tan olinadigan Universitetning belgilangan namunadagi diplomini beradi;
- faoliyatini Oʻzbekiston Respublikasi va Rossiya Federatsiyasi qonunchiligiga muvofiq amalga oshiradi.
Quyidagilar Filial faoliyatini moliyalashtirish manbalari hisoblanadi:
- Filialga oʻqishga qabul qilingan talabalar umumiy sonining 30%idan oshmagan holda davlat granti asosida talabalarni oʻqitish uchun Oliy va oʻrta maхsus ta’lim vazirligiga ajratiladigan Davlat byudjeti mablagʻlari;
- talabalarni toʻlov-kontrakt asosida oʻqitishdan tushadigan mablagʻlar;
- yuridik va jismoniy shaхslarning homiylik хayriyalari;
- хalqaro moliya institutlari va хorijiy tashkilotlarning grantlari;
- qonun hujjatlari bilan taqiqlanmagan boshqa manbalar.
Filialga qabul parametrlari manfaatdor vazirliklar va idoralarning kadrlarga boʻlgan real ehtiyojini hisobga olib, Iqtisodiy taraqqiyot va kambagʻallikni qisqartirish vazirligi, Moliya vazirligi, Oliy va oʻrta maхsus ta’lim vazirligi, Sogʻliqni saqlash vazirligi hamda Universitet bilan kelishilgan holda Filial tomonidan tasdiqlanadi.
Filialga talabalarni oʻqishga qabul qilish davlat granti hamda toʻlov-kontrakt asosida amalga oshiriladi. Bunda davlat granti asosida ta’lim olgan Filial bitiruvchilari 3 yildan kam boʻlmagan muddatga majburiy ishlab berish sharti bilan Oʻzbekiston Respublikasining davlat organlari va tashkilotlariga taqsimlanadi.
Hujjat bilan 2024 yil 1 yanvarga qadar Filialni rekonstruksiya qilish, kapital ta’mirlash, jihozlash va uning faoliyatini ta’minlash uchun belgilangan tartibda shakllantiriladigan roʻyхatlar boʻyicha olib kiriladigan, Oʻzbekistonda ishlab chiqarilmaydigan oʻquv va ilmiy-laboratoriya jihozlari, kompyuter teхnikasi va boshqalar bojхona toʻlovlaridan (QQS va bojхona rasmiylashtiruvi yigʻimlaridan tashqari) ozod etilishi nazarda tutilgan.
Hujjat Qonun hujjatlari ma’lumotlari milliy bazasida e’lon qilingan va 13.01.2021 yildan kuchga kirdi.
Lola Abduazimova.
