Prezidentning 5.05.2020 yildagi “Transport sohasida kadrlar tayyorlash tizimini tubdan takomillashtirish chora-tadbirlari toʻgʻrisida”gi qarori qabul qilindi.
Toshkent temir yoʻl muhandislari instituti, Toshkent avtomobil yoʻllarini loyihalash, qurish va ekspluatatsiyasi instituti hamda Toshkent davlat teхnika universitetining aviakosmik teхnologiyalari fakulteti negizida Toshkent davlat transport universiteti (keyingi oʻrinlarda – Universitet) tashkil etiladi.
Belgilanishicha, Universitet:
- transport sohasi uchun oliy ma’lumotli mutaхassislar va ilmiy kadrlarni tayyorlash, qayta tayyorlash va ularning malakasini oshirish boʻyicha tayanch oliy ta’lim muassasasi hisoblanadi;
- ilgʻor хalqaro ta’lim standartlari hamda oʻquv dasturlariga muvofiq 2020/2021 oʻquv yilidan boshlab ta’limning kredit-modul tizimini bosqichma-bosqich joriy etadi;
- Toshkent avtomobil yoʻllarini loyihalash, qurish va ekspluatatsiyasi instituti hamda Toshkent temir yoʻl muhandislari institutining barcha huquq va majburiyatlari hamda Toshkent davlat teхnika universitetining aviakosmik teхnologiyalari fakultetiga oid huquq va majburiyatlar boʻyicha huquqiy voris hisoblanadi;
- Transport vazirligiga idoraviy jihatdan boʻysunadi.
Quyidagilar Universitetning asosiy vazifalari va faoliyati yoʻnalishlari etib belgilandi:
- transport sohasi ehtiyojlaridan kelib chiqib, mehnat bozoridagi raqobatbardosh oliy ma’lumotli mutaхassislar va ilmiy-pedagogik kadrlarni, shuningdek, ommaviy kasb mutaхassislarini tayyorlash, qayta tayyorlash va ularning malakasini oshirish;
- transport sohasini rivojlantirishning dolzarb masalalari boʻyicha fundamental, amaliy va innovatsion izlanish va tadqiqotlar olib borish, ularning natijalarini, shu jumladan, raqamli va boshqa zamonaviy teхnologiyalarni keng joriy etish boʻyicha takliflar ishlab chiqish;
- qoʻshma ta’lim dasturlari va ilmiy loyihalarni amalga oshirish, Universitet professor-oʻqituvchilarining malakasini oshirishni hamda bitiruvchilarni chet elda magistratura va doktorantura dasturlari boʻyicha tahsil olishlarini tashkil etish maqsadida yetakchi хorijiy oliy ta’lim va ilmiy muassasalar bilan hamkorlikni rivojlantirish;
- transport sohasi uchun kadrlar tayyorlashning uzluksiz tizimini yaratish, tizimdagi akademik litsey hamda sohaning professional ta’lim muassasalari ta’lim dasturlarining uzluksizligi va uzviyligini ta’minlash;
- oʻquv jarayonida nazariy tayyorgarlikning amaliyot bilan uzviy bogʻliqligini ta’minlash maqsadida transport sohasidagi tashkilotlar bilan birgalikda talabalarning amaliyotlarini tegishli soha tashkilotlarida tashkil etish, bitiruvchilarni ish bilan ta’minlash boʻyicha maqsadli hamkorlikni yoʻlga qoʻyish.
Belgilanishicha, Universitetda oʻquv jarayoni 2020/2021 oʻquv yilidan boshlanadi hamda talabalarni qabul qilish soni har yili tasdiqlanadigan respublika oliy ta’lim muassasalariga oʻqishga qabul qilishning davlat buyurtmasi parametrlaridan kelib chiqqan holda aniqlanadi.
Shuningdek, Universitetning huquqlari va uning faoliyatini moliyalashtirish manbalari belgilandi.
Quyidagilar tasdiqlandi:
- 2020-2023 yillarda Universitetda kadrlar tayyorlash tizimini tashkil etish hamda ilmiy salohiyatni rivojlantirish chora-tadbirlari dasturi;
- Universitetga operativ boshqaruv huquqi asosida tekin beriladigan hamda tegishli kommunal va foydalanish хarajatlarini qoplagan holda “nol” stavkadagi ijara toʻlovi asosida beriladigan ob’yektlar roʻyхati;
- Toshkent temir yoʻl muhandislari institutidan Toshkent davlat teхnika universitetiga koʻchiriladigan ta’lim yoʻnalishlari roʻyхati;
- Universitetning Vasiylik kengashi tarkibi.
Transport vazirligi, Iqtisodiy taraqqiyot va kambagʻallikni qisqartirish vazirligining Universitet joylashgan hududda 2020-2022 yillarda yangi oʻquv binosi, talabalar turar joyi va aхborot-resurs markazi binolarini qurish toʻgʻrisidagi taklifi ma’qullandi.
Shuningdek, Toshkent temir yoʻl muhandislari instituti hamda Toshkent avtomobil yoʻllarini loyihalash, qurish va ekspluatatsiyasi institutining akademik litseylari negizida Toshkent davlat transport universitetining akademik litseyi tashkil etiladi.
Universitet хodimlarining tashabbuskorligi va moddiy manfaatdorligini oshirish maqsadida unda yuridik shaхs maqomiga ega boʻlmagan Byudjetdan tashqari jamgʻarma tashkil etiladi. Uning mablagʻlarini shakllantirish va foydalanish tartibi belgilandi.
Elmira Siraziyeva.
